Հայտնի ռուս օլիգարխ, «Չելսի» ակումբի նախագահ Ռոման Աբրամովիչը ամոթով է մնացել «զբոսանավերի պատերազմում», որը տեղի է ունեցել օրերս Միջերկրական ծովում: Այս մասին այսօր գրում է The Daily Mail-ը: Նրա նավերից մեկը` 115 մետր երկարությամբ Luna զբոսանավը, խարիսխ է գցել ֆրանսիական Անտիբ նավահանգստում` մեծ տպավորություն թողնելով ներկաների վրա:
Սակայն այստեղ հանգստացողներից շատերն էլ ավելի են զարմացել և հիացել, երբ այստեղ է ժամանել Octopus զբոսանավը, որը պատկանում է Microsoft-ի համահիմնադիր Փոլ Ալենին: Այն 11 մետրով ավելի երկար է, քան ռուս օլիգարխի զբոսանավը: Ինչպես գրում է թերթը, Ալենն այս քայլով «տեղն է դրել» Աբրամովիչին:
Ըստ թերթի` երկու զբոսանավերի վրա կա ուղղաթիռի երկու հարթակ, երկուական սուզանավ, լոզավազան և բասկետբոլի խաղադաշտ: Այդուհանդերձ, Աբրամովիչը հայտնի է նրանով, որ աշխարհի ամենամեծ զբոսանավը`Eclipse-ը, որի երկարությունը 163 մետր է, պատկանում է նրան: Ըստ Forbes-ի հրապարակած միլիարդատերերի ցուցակի նույնպես Աբրամովիչը գերազանցում է Ալենին. նա զբաղեցնում է 53-րդ հորիզոնականը, իսկ Ալենը` 57-րդ: