Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանը չի պատկերացնում, թե քառօրյա պատերազմից և 3 նախապայմաններ առաջադրելուց հետո ՀՀ նախագահ Սերժ Սարգսյանը Վիեննայում ինչ պետք է խոսի Ադրբեջանի նախագահ Իլհամ Ալիևի հետ:
«Պետք է գան և բացատրություն տան, թե ինչպես է եղել, որ առանց Ղարաբաղի մասնակցության համաձայնել են հանդիպման, քանի որ Ադրբեջանը ձգտում է ամեն կերպ դուրս մղել Ղարաբաղը բանակցություններից՝ որպես գործոն, և նույնիսկ բարձրացրեց 1994-95թթ. պայմանագրերից հրաժարվելու հարց: Իսկ Ղարաբաղի ձեռքերն ազատ են՝ նա կարող է ասել՝ չեք կանչել հանդիպման, մենք կորոշենք»,- ասաց Մանվել Սարգսյանը:
Նրա խոսքով՝ այս հանդիպման միակ արդարացումը կլինի այն, եթե Ադրբեջանը դուրս գա այդ գրավված դիրքերից, հակառակ դեպքում այդ հանդիպումը պարունակում է մեծ ռիսկեր և վտանգներ:
«Հայաստանը նաև չպետք է խոսի կարգավորման պրոյեկտների մասին, եթե խոսեն, կարելի է ասել՝ կատարել են հերթական հակապետական որոշումը՝ ճիշտ այնպես, ինչպես եղավ այդ զինադադարը հաստատելու օրերին. ուրիշի թելադրանքով՝ ի վնաս մեր շահերի, հօգուտ Ադրբեջանի, Ռուսաստանի»,- նկատեց Մանվել Սարգսյանը:
