Վրաստանի և Հարավային Օսիայի սահմանագիծը ամեն տեղ չէ, որ հստակ եզրագծված է: Որոշ տեղերում չկան ոչ ցանկապատեր, ոչ ցուցանակներ, որոնք ցույց կտան, թե որտեղից է սկսվում Հարավային Օսիան, որը 90-ականներին ԽՍՀՄ փլուզումից հետո հռչակեց իր անկախությունը, առանձնացավ Վրաստանից, իսկ անցյալ տարի համագործակցության և ինտեգրման վերաբերյալ համաձայնագիր կնքեց Ռուսաստանի հետ:
Ջարիաշենի գյուղում Վրաստանի և Հարավային Օսիայի սահմանագիծն անցնում է մայրուղով: Սահմանագծից 100 մետր հեռավորության վրա՝ Վրաստանի տարածքում, երկու վրացիներ բացատրում են նախկին խորհրդային երկրի քաղաքացիների միջև հիմնական հակասությունները: Նրանցից մեկն այն կարծիքին է, որ պետք է կողմնորոշվել դեպի Մոսկվա, իսկ մյուսը Եվրոպային հարելու կողմնակից է:
Ներկա պահին Վրաստանը ստիպված է լավ հարաբերություններ ստեղծել իր մերձավոր հարևանի՝ Ռուսաստանի հետ, միևնույն ժամանակ բարեփոխումներ է իրականացնում, որոնք թույլ կտան ինտեգրվել ԵՄ-ին և ՆԱՏՕ-ին: Վրաստանը ստիպված է նաև դիմակայել բնակչության շրջանում աճող դժգոհությունը առ այն, որ ԵՄ-ին ինտեգրվելու գործընթացը դանդաղ է ընթանում, միաժամանակ պայքարում է նաև հակաեվրոպական պրոպագանդայի դեմ: Կովկասյան հետազոտությունների ռեսուրսների կենտրոնի տվյալներով՝ 2008թ. վրացիների 58%-ն էր վստահում Բրյուսելին, իսկ 2013թ.՝ միայն 33%-ը:
«Ես իրավունք չունեմ շփվելու Հարավային Օսիայի բնակիչների հետ, սակայն այստեղ ես ինձ անվտանգ եմ զգում»,- ասում է 75-ամյա Էլիզբար Մեստումրիշվիլին: Նրա տան մոտերքում ռուսական ռազմաբազա է տեղադրված, նրան ընդհատում է 43-ամյա Դավիթ Գոկիաշվիլին՝ սահմանը մատնացույց անելով. «Նա այնքան հաճախ է տեսնում ռուսներին, որ սկսել է վախենալ նրանցից. Մոսկվան կտրեց մեր կապերը, նա պետք է հեռանա»:
Վրաստանը պայքարում է հակաեվրոպական քարոզչության երկու տեսակի դեմ. մեկն այն է, որ փորձում են վրացիներին համոզել, թե Վրաստանը, չնայած իր ձգտումներին, երբեք չի դառնա ԵՄ անդամ, իսկ մյուսը՝ վախեցնելով վրացիներին նրանով, որ Եվրոպային ինտեգրվելով, կկորցնեն ավանդական արժեքները՝ քարոզում են մտերմանալ Մոսկվայի հետ:
Չնայած նման քարոզչությունը գնալով ուժեղանում է, Վրաստանում եվրոպական ինտեգրացիայի հարցերով նախարար Դավիթ Բաքրաձեն համարում է, որ ԵՄ-ին ինտեգրվելուն հակված բնակչության տոկոսը շարունակում է բարձր մնալ:
Վրաստանում այս տարի հոկտեմբերին կայանալիք խորհրդարանական ընտրությունների նախաշեմին կառավարությունը, որի կազմի մեջ մտնում են եվրոպամետ «Վրացական երազանք» կոալիցիայի անդամները, խնդրում է ԵՄ-ին և ՆԱՏՕ-ին գոնե ինչ-որ քայլ անել: Կառավարությունը հավատացնում է, որ կատարել է իր պարտավորությունները, ժողովրդավարական բարեփոխումներ է իրականացրել, մասնավորապես՝ կրթության և պաշտպանության բնագավառում և խոստանում է շարունակել այդ ուղղությունը:
«Մենք սպասում ենք, որ հուլիսին Վարշավայում կայանալիք ՆԱՏՕ-ի գագաթնաժողովում կհնչի համապատասխան ազդանշանը: Մենք պետք է մտնենք դաշինք, ես հավատացած եմ, որ այդ հանդիպումը մեզ ավելի շատ գործիքներ կտա, քան այսօր ունենք»,- ասել է Վրաստանի պաշտպանության նախարար Թինաթին Խիդաշելին:
Հնարավոր է, որ ապագա ընտրությունների արդյունքում խորհրդարան մտնեն քաղաքական երկու կուսակցություններ, որոնց ծրագրերը հակված են Ռուսաստանի հետ մերձեցմանը: Սակայն դա չի անհանգստացնում Վրաստանի նախագահ Գեորգի Մարգվելաշվիիին: Նրա խոսքով՝ մարդիկ քվեարկում են՝ մտածելով ոչ միայն արտաքին քաղաքականության մասին: «Եթե այդ կուսակցությունները մտնեն խորհրդարան, դա կապացուցի այն, որ մեր երկրում կա ժողովրդավարություն»,- ասել է նա:
