Քաղաքագետների միության նախագահ Հմայակ Հովհաննիսյանի գնահատմամբ, Ռոբերտ Քոչարյանի հարցազրույցը սպասելի էր, այստեղ ամեն ինչ հստակ է, և անգամ մեկնաբանման կարիք չկա:
«Քոչարյանն ասել է այն, ինչ կասեր, եթե Մարտի 1-ի դեպքերն ուսումնասիրող ԱԺ ժամանակավոր հանձնաժողովը նրան հրավիրեր բացատրություն տալու: Այն, ինչ նա ասելու էր այն ժամանակ, ասել է հիմա` կանխելով բոլոր հնարավոր տիպի հարցադրումները»,- «Առաջին լրատվական»-ի հետ զրույցում կարծիք հայտնեց Հ. Հովհաննիսյանը:
Հովհաննիսյանը նշեց, թե Քոչարյանը հստակ ասում է, որ ինքը գործել է ըստ Սահմանադրության, և եթե ոստիկանապետը իր կողմից գրավոր հրաման չի ստացել, ապա, բնականաբար, գործադիր մարմիններն իրենց վրա են վերցրել այդ պատասխանատվությունը, և հենց նրանք էլ պիտի հարցաքննվեն։
Քոչարյանի անդրադարձն ընդդիմության և իշխանության միջև առկա երկխոսությանը, ըստ Հովհաննիսյանի, ակնարկ է այն բանի, որ եթե սկսել են երկխոսություն, ապա ներկա իրավիճակի ողջ պատասխանատվությունը հենց երկխոսողների վրա է: Ինչ վերաբերում է ներկա տնտեսական իրավիճակի վատթարացման մասին Քոչարյանի ակնարկներին, Հովհաննիսյանը նկատեց. «Պարզ է, որ կա հայտ անհրաժեշտության դեպքում օգտվելու կառավարման մեջ արձանագրված ձախողումներից»: