Ազգային ժողովում ներկա պահին քննարկվում է ՀՀ պատվավոր կոչումների մասին ՀՀ օրենքում փոփոխություններ և լրացումներ կատարելու օրենքի նախագիծը երկրորդ ընթերցմամբ ընդունելու հարցը:
Անդրադառնալով օրենքում առաջ քաշված հարցերին՝ ՀՅԴ խմբակցության պատգամավոր Լիլիթ Գալստյանը կրթության նախարար Արմեն Աշոտյանին խնդրեց պարզաբանել, թե ինչ է նշանակում «պատվավոր մանկավարժ» ասվածը: Արմեն Աշոտյանը պարզաբանեց, որ վաստակավոր մանկավարժի կոչումը տրվում է երկարաժամկետ բուռն գործունեություն ծավալած աշխատանքի համար, այսինքն՝ տարիների ընթացքում արդյունավետ և երկարատև աշխատանքի արդյունքում, իսկ պետական պարգևը՝ միանվագ, բացառիկ գյուտի, հետազոտության համար:
ԱԺ-ում երկրորդ ընթերցման ներկայացվեց ՀՀ Գույքահարկի և Հողային օրենսգրքում փոփոխություններ և լրացումներ կատարելու մասին օրենքի նախագիծը: Որպես զեկուցող հրավիրվել էր ֆինանսների նախարար Վաչե Գաբրիելյանը:
Վերջինիս խոսքերով, օրենքը միտված է բարելավելու գործարար միջավայրը, նախատեսված է դրանով թեթևացնել հաշվետվությունների և վճարումների քանակը: Չորս անգամ կրճատվել է հաշվետվությունների քանակը, իսկ վճարումները կլինեն տարեկան մեկ կամ երկու անգամ, ինչը ենթադրում է, որ էականորեն թեթևանում է տնտեսվարող սուբյեկտների գործունեությունը։ Առաջին ընթերցումից հետո պատգամավորների կողմից առաջարկություններ և լրացումներ չեն եղել:
ԱԺ պատգամավորները ֆինանսների նախարարին հարց չուղղեցին, հավանաբար այն պարզ պատճառով, որ ԱԺ 131 պատգամավորներից ներկա էին ընդամենը 20-ը: