Մայիսի 6-ին Հայ Բարեգործական Ընդհանուր Միության Փարիզի Ալեքս Մանուկյանի անվան մշակութային կենտրոնում տեղի ունեցավ Արցախյան ազատամարտի հայաստանցի և սփյուռքահայ մասնակիցներին հուշամեդալների հանձնման արարողություն: «Ազատամարտիկ» Ռազմա-հայրենասիրական բարեգործական հասարակական կազմակերպության նախագահ, Սոսե Մայրիկ ջոկատի նախկին հրամանատար Հայկ Հարությունյանը Արցախյան պատերազմի ֆրանսաբնակ վեց մասնակիցներին պարգևատրեց կազմակերպության հիմնած «Ազատամարտիկ» հուշամեդալով: Մի քանիսն էլ պարգևատրվեցին «Ազատամարտիկ» հասարակական կազմակերպության պատվոգրերով: Ցուցադրվեց կազմակերպության գործունեության մասին պատմող փաստագրական ֆիլմ:
Երեկոյան նույն կենտրոնում տեղի ունեցավ Լոս Անջելեսի Կալիֆորնիայի համալսարանի պրոֆեսոր Ռիչարդ Հովհաննիսյանի «Ի խույզ Արևմտյան Հայաստանի և Հայկական Կիլիկիայի» թեմայով դասախոսությունը:
Մայիսի 7-ին Փարիզի մերձակայքում գտնվող Սևր քաղաքում տեղակայված Մխիթարյան միաբանությանը պատկանող Սամուել-Մուրադ վարժարանի մշակութային կենտրոնում բացվեց Հայաստանի նկարիչների միության նախագահ Կարեն Աղամյանի գեղանկարչական գործերի ցուցահանդեսը: Միջոցառման հովանավորն էր Ֆրանսիայի Հանրապետությունում Հայաստանի Հանրապետության դեսպանությունը և այն նվիրված էր վարժարանի հիմնադրման 175 և Հայաստանի Հանրապետության անկախության 20-ամյա տարելիցներին:
Մայիսի 9-ին Փարիզի մերձակայքում գտնվող Կլամար քաղաքի Ժան Արպի անվան թատրոնում տեղի ունեցավ 1960 թ. ի վեր Փարիզում լույս տեսնող «Աշխարհ» պարբերականին ի օժանդակություն կազմակերպված բարեգործական գալա-համերգը: Համերգային ծրագրով հանդես եկան Ֆրանսիայում գործող «Անի» և «Նոր ալիք» պարային համույթները: Միջոցառման տոմսերի վաճառքից և այլ հանգանակություններից ստացված ողջ հասույթը կտրամադրվի ֆինանսական դժվարությունների առաջ հայտնված «Աշխարհ» երկշաբաթաթերթի կարիքներին:
