«Երիտասարդական խորհրդարանի գործունեությունը ցույց կտա, թե ինչի համար է այն ստեղծված: Սպասենք մի փոքր և ականատես կլինենք երիտասարդական խորհրդարանի աշխատանքներին, և հետո նոր ձեզ հետ միասին կգանք եզրահանգումների՝ սա PR ակցիա՞ էր, թե՞ հետապնդում է իրականում ամրագրված նպատակները»,- անդրադառնալով հարցին, թե արդյոք խորհրդարանական ընտրություններից առաջ երիտասարդական խորհրդարան ստեղծելով՝ իշխանությունները PR ակցիա՞ են իրականացնում, նկատեց ԱԺ ՀՀԿ խմբակցության պատգամավոր Արտակ Դավթյանը:
Նրա գործընկեր, ԲՀԿ-ական պատգամավոր Վահե Էնֆիաճյանը ևս համաձայն չէր այդ դիտարկմանը և նկատեց, որ երիտասարդական խորհրդարանի ստեղծումը վաղուց հասունացած քայլ էր. «Այս քայլը դրական ընկալում ունի երիտասարդության կողմից և եթե այլ ձևով է մեկնաբանվում, ես որևէ խնդիր չեմ տեսնում»:
Նշենք, որ այս երիտասարդական խորհրդարանը կարողանալու է գործել ընդամենը մեկ տարի, քանզի 2012 թ. խորհրդարանական ընտրությունների մեկնարկին այն այլևս չի կարողանալու գործունեություն ծավալել:
Հարցին, թե երիտասարդ խորհրդարանականներն իրենց տարիքով գործընկերների նման թիկնապահներ ունենալո՞ւ են, Դավթյանը պատասխանեց, որ ինքն էլ է այդ տարիքովների շարքում և թիկնապահ չունի: Դավթյանը նկատեց, որ եթե երիտասարդ խորհրդարանականներն իրենց պահեն անպատշաճ կերպով, ապա իրենք նրանց ետ կանչելու կոչով կդիմեն երիտասարդներին ներկայացնող մարմիններին:
Տեղեկացնենք, որ երիտասարդական խորհրդարանը իր գործունեությունը սկսելու է մայիսի կեսերից: