ԱԺ կրթության, գիտության, մշակույթի և երիտասարդության մշտական հանձնաժողովի նախագահ, ՀՀԿ-ական Արտակ Դավթյանը և նույն հանձնաժողովի անդամ, ԲՀԿ-ական Վահե Էնֆիաճյանն այսօր լրագրողներին ներկայացրին երիտասարդական խորհրդարանի կազմավորումը և նրա գործունեության նպատակները:
Արտակ Դավթյանը տեղեկացրեց, որ երիտասարդական խորհրդարան ստեղծելու գաղափարի հեղինակը ԱԺ խոսնակ Հովիկ Աբրահամյանն է: Դավթյանը նկատեց, որ երիտասարդական խորհրդարանն իր ձևով և բովանդակությամբ նման է լինելու` ունենալու է 131 պատգամավոր, 12 մշտական հանձնաժողովներ, սակայն այս խորհրդարանը առանձին նախագահ և փոխնախագահներ չի ունենալու` այդ պաշտոնը ռոտացիոն կերպով միմյանց են փոխանցելու հանձնաժողովների նախագահները:
Նշենք, որ ապրիլի 30-ին ավարտվել է երիտասարդական խորհրդարանում առաջադրվելու ժամկետը: «Երիտասարդական խորհրդարանի անդամ կարող է դառնալ ՀՀ 18-30 տարեկան ցանկացած քաղաքացի: 50 տեղ հատկացվելու է պետական և ոչ պետական բուհերին, 39 տեղ` ԱԺ-ում գործող խմբակցություններին` ըստ համամասնության, որով ներկայացված են, և 42 տեղ հատկացվելու է ինքնաառաջադրման կարգով ներկայացված երիտասարդներին»,- մանրամասնեց Դավթյանը՝ հավելելով, որ հնարավոր է՝ աղջիկների ներկայացվածությունը 30 տոկոսից էլ ավելի լինի:
Դավթյանն ասաց, որ այսօրվա դրությամբ երիտասարդական խորհրդարանի մեկ տեղի համար իրենք ունեն մոտ 8 հավակնորդ:
Հարցին, թե արտախորհրդարանական ուժերի, մասնավորապես` ՀԱԿ-ի անդամ երիտասարդները ներկայացված լինելո՞ւ են երիտասարդական խորհրդարանում, Դավթյան պատասխանեց. «Ես ինքս դեռ չեմ ուսումնասիրել առաջադրվածների ցուցակները, սակայն եթե լինեն այդպիսիք, ապա մենք հավասար պայմաններում անպայման առաջնահերթությունը կտանք արտախորհրդարանական կուսակցությունների ներկայացուցիչներին»:
ԲՀԿ-ական պատգամավոր Վահե Էնֆիաճյանն էլ նկատեց, որ սա շատ լավ նախաձեռնություն է, քանզի երիտասարդները հնարավորություն կունենան անմիջականորեն մասնակցել խորհրդարանի աշխատանքներին, և նրանց ձայնը լսելի կլինի տարիքով խորհրդարանականների համար:
Նշենք, որ երիտասարդական խորհրդարանը գործելու է հասարակական կարգով, ունենալու են մանդատ, սակայն աշխատավարձ չեն ստանալու, նրանց որոշումները իրավական ուժ չեն ունենալու, սակայն, Դավթյանի խոսքերով, նրանց առաջարկները անպայման հաշվի են առնվելու:
