Բեն Լադենը կարծես լուրջ հակասությունների առիթ դարձավ Պակիստանի և ԱՄՆ-ի միջև: Մենք տեղեկացրել էինք, որ Պակիստանի հետախուզությունը երեկ դիմել է մի քայլի, որը տանում է ԱՄՆ-ի հետ բացահայտ առճակատման:
Պակիստանյան մամուլում հրապարակվել է Պակիստանում ԱՄՆ կենտրոնական հետախուզական վարչության (ԿՀՎ) ներկայացուցչի անունը: Արդեն հայտնի է, որ ԱՄՆ-ն չի պատրաստվում հետ կանչել իր հետախույզին` ասելով, թե ներողություն չի խնդրելու Պակիստանի տարածքում իրականացված այն օպերացիայի համար, որի ժամանակ սպանվել էր Ուսամա բեն Լադենը: Օպերացիայից հետո ԱՄՆ-ն իր հերթին պակիստանյան իշխանություններին մեղադրեց սեփական տարածքում Բեն Լադենին բնակվելու իրավունք տալու համար: Ամերիկացիներն արդեն համոզված ասում են, որ «թիվ մեկ» ահաբեկիչն այդ երկրում ունեցել է «իր մարդիկ»:
Այսպիսով, հարաբերությունները երկու երկրների միջև շարունակում են լարվել: RBC-ն հիշեցնում է, որ Պակիստանը հետախույզների անունները գաղտնազերծելու հնարքին առաջին անգամ չէ, որ դիմում է: Նախորդ գաղտնազերծումը եղել էր կես տարի առաջ, այն բանից հետո, երբ ամերիկյան անօդաչու ինքնաթիռը հրթիռային հարված էր հասցրել Պակիստանին` սպանելով խաղաղ բնակիչների:
Երեկ Պակիստանի վարչապետ Ասիֆ Ալի Զարդարին այս հարցով ելույթ է ունեցել երկրի խորհրդարանում` ասելով, որ «Պակիստանին ուղղված բոլոր մեղադրանքներն անհեթեթ են»` սկսած ոչ կոմպետենտությունից մինչև Բեն Լադենին հովանավորելը: Զարդարին միաժամանակ հայտարարել է, որ Բեն Լադենի սպանությունն արդարացված է եղել:
Ենթադրվում է, որ պակիստանյան իշխանությունները գաղտնազերծելու միջոցով երկու խնդիր են լուծում. նախ` վնաս են հասցնում ամերիկացիներին, որոնք օր ու գիշեր ասում են, թե «Պակիստանում մի բան այն չէ», և երկրորդ՝ շեղում են ուշադրությունն այն իրավիճակից, որը ստեղծվել է Պակիստանի տարածքում Բեն Լադենին հայտնաբերելուց հետո:
Բացի այդ, «Ջերոնիմո» օպերացիայից հետո, ինչպես անվանել էին Բեն Լադենի չեզոքացման գործողությունը, սրվել է նաև Պակիստանի ներքին իրավիճակը։ Պակիստանի զինվորականությունն ու հետախուզությունը նույնպես ուշադրության ներքո են երկրի ներսում: Նրանց մեղադրում են երկու բանում՝ երկար տարիների ընթացքում Բեն Լադենին սեփական տարածքում չհայտնաբերելու և երկրի սրտում ամերիկացիների հարձակումը կանխել չկարողանալու մեջ:
Այդուհանդերձ, ոչ Պակիստանը և ոչ էլ ԱՄՆ-ն չեն ձգտում վերջնականապես այրել բոլոր կամուրջները: Միացյալ Նահանգներում շարունակ հայտարարում են, որ չեն դադարեցնելու սերտ համագործակցությունը Պակիստանի հետ իրենց հետաքրքրող բոլոր ոլորտներում: