Ավստրալացի գիտնականներն այդ երկրում արտաքին գովազդի բիզնեսով զբաղվող APN Outdoor ընկերության պատվերով հետազոտություններ են իրականացրել և պարզել, որ շարժվող տրանսպորտի վրա տեղադրված գովազդն ավելի արդյունավետ է, քան ստատիկ վիճակում գտնվողը:
Ըստ այդմ պարզվել է, որ սպառողն, օրինակ, ավելի դրականորեն է արձագանքում ոչ թե վահանակի , այլ ավտոբուսին տեղադրված գովազդին: Բացի այդ, գիտնականները հայտնաբերել են, որ այդ տիպի գովազդը 33%-ով ավելի լավ է հիշվում, քան ստատիկ վիճակում գտնվողը: Այն ավելի լավ է ներկայացնում առաջարկվող ապրանքի առանձնահատկությունը:
Հետազոտության ընթացքում գիտափորձին մասնակցած 126 մարդու առաջարկվել էր դիտել շարժական և ստատիկ գովազդ: Ընդ որում, առաջարկվող երկու տեսակի գովազդը ցուցադրվել է հավասար ժամանակ, որի ընթացքում գիտնականներն ուսումնասիրել են առաջարկվող գովազդներին մարդու ուղեղի արձագանքները:
Այժմ APN Outdoor ընկերության ներկայացուցիչները պատրաստվում են գովազդատուներին ներկայացնել այս հետազոտության արդյունքները նրանց գովազդն ավելի արդյունավետ դարձնելու համար: