Վրացական Apsny.ge կայքի փոխանցմամբ, Վրաստանի նախկին նախագահ Էդուարդ Շևարդնաձեն հայտարարել է, որ այսօր վրացական ընդդիմությունը ի վիճակի չէ փողոց դուրս բերելու 10.000 հոգու.
«Հեղափոխությունն իրականացնում է ոչ թե ընդդիմությունը, այլ` ժողովուրդը: Երկու տարի առաջ փողոց դուրս եկավ 60.000 մարդ, սակայն ընդդիմությունն ի վիճակի չեղավ անհրաժեշտ քայլեր գործելու համար:
Այժմ ժողովուրդը հիասթափվել է ընդդիմությունից, և որպեսզի մենք նորից ականատես լինենք երկու տարի առաջ փողոց դուրս եկած մարդկանց թվաքանակին, ժամանակ է անհրաժեշտ: Ես չեմ հավատում այն լուրերին, թե վրացական ընդդիմությունը սնվում է ռուսական փողերով:
Մյուս կողմից էլ` ժողովուրդը դժգոհելու տեղ ունի և շուտով դուրս կգա փողոցներ: Երկրում ստեղծված ծանր դրության պատճառով ժողովուրդը կասի իր ծանրակշիռ խոսքը»:
Հիշեցնենք, որ այսօր Վրաստանում բողոքի ակցիաներ է իրականացնում ընդդիմադիր «Վրացական կուսակցությունը»:
Ինչ վերաբերում է ռուսական միջոցներով վրացական ընդդիմության ֆինանսավորմանը, ապա օրեր առաջ ռուսական Версия թերթը գրեց, որ ռուս օլիգարխ Աբրամովիչի փողերը կարող են վրացական ընդդիմությանը հասնել Վրաստանի ֆուտբոլի ֆեդերացիայի (ՎՖՖ) նախկին նախագահ, գործարար Մերաբ Ժորդանիայի միջոցով, որը սերտ հարաբերությունների մեջ է Աբրամովիչի հետ:
