Ըստ BBC-ի ռուսական ծառայության՝ Վրաստանի արտգործնախարար Գրիգոլ Վաշաձեն ֆաշիզմի դեմ տարած հաղթանակի 66-րդ տարեդարձի կապակցությամբ Ռուսաստանի նախագահ Դմիտրի Մեդվեդևի` վրաց ժողովրդին հղած շնորհավորական ուղերձը որակել է որպես ծաղր:
Վրաստանի քաղաքացիներին ուղղված իր շնորհավորական ուղերձում Մեդվեդևը նշել է, որ Ռուսաստանը մշտապես հավատարիմ է եղել և մնալու վրաց ժողովրդի հետ ունեցած դարավոր բարեդրացիական ու բարեկամական ավանդույթներին. «Մենք ցանկանում ենք Վրաստանը տեսնել բարգավաճ և ազատ երկիր, որը խաղաղ հարաբերությունների մեջ է իր բոլոր հարևանների հետ»:
Ի դեպ, Մեդվեդևը շնորհավորական ուղերձներ է հղել նաև Աբխազիայի և Հարավային Օսիայի ղեկավարներին. Այս երկրների անկախությունը Ռուսաստանը ճանաչել էր 2008 թվականին:
Այս կապակցությամբ Վաշաձեն ասել է. «Ես չեմ կարծում եմ, թե վրաց ժողովուրդը կամ որևէ վրացի ընդունել է Ռուսաստանի նախագահի շնորհավորանքը: Այդ ծաղրը սահմաններ չունի, մարդ կարող է այն աստիճան ծաղրածություն անել, որքան որ դա պետք է իրեն:
Նախ՝ մենք դիվանագիտական հարաբերություններ չունենք Ռուսաստանի հետ, և երկրորդ` դժբախտաբար 1941-1945 թվականներին ֆաշիզմի դեմ պայքարած մարդկանց թոռներն ընդօրինակել են նրանց մեթոդները և էթնիկական զտումների արդյունքում արտաքսել են 400.000 վրաց քաղաքացիների»:
Իսկ Վրաստանի փոխարտգործնախարար Նինո Կալանդաձեն հայտարարել է, որ Գերմանիան կապիտուլացվել է մայիսի 8-ին և ոչ թե 9-ին, դրա համար էլ համայն աշխարհում ֆաշիզմի դեմ հաղթանակը պետք է նշվի հենց մայիսի 8-ին:
Հիշեցնենք, որ ներկայումս Վրաստանի տարածքային ամբողջականության վերականգնման գծով խորհրդարանական ժամանակավոր հանձնաժողովը, ներքին գործերի նախարարության և Գլխավոր դատախազության հետ համատեղ, շարունակում է նյութեր հավաքել Վրաստանում իրականացված էթնիկ զտումների մասին, որից հետո դրանք պետք է ուղարկվեն միջազգային դատարաններ: