Սոցիոլոգ Ահարոն Ադիբեկյանի գնահատմամբ՝ ընդդիմություն-իշխանություն երկխոսությունն այնքանով իմաստ ունի, որքանով դա կարող է այս կամ այն կողմին օգնել իր կողմը գրավելու մինչ այդ իրեն չհամակրող ընտրազանգվածի:
«Առաջին լրատվական»-ի հետ զրույցում Ադիբեկյանը նկատեց, թե սխալ են այն կարծիքները, թե այդ երկխոսությունը հիասթափեցնում է ընտրազանգվածին. «Ցանկացած երկխոսություն, բացահայտ կամ գաղտնի, ենթադրում է քաղաքական առևտուր, իսկ այդ առևտուրն ընդունելի է մեր ժողովրդի համար` էլեկտորատը միշտ պատրաստ է նման երկխոսությունների»:
Սոցիոլոգը նկատեց, որ ընտրազանգվածը միատարր չէ, և կան թե՛ այդ երկխոսությունից հիասթափվողներ, թե՛ ոգեշնչվողներ, ինչն էլ պայմանավորված է ներկայումս երկրում առկա իրավիճակով:
Այդուամենայնիվ, ըստ Ադիբեկյանի, իշխանություն-ընդդիմություն երկխոսության պատճառով քաղաքական դաշտում վերադասավորումներն այնքան էլ էական չեն լինի. «Օրինակ` ՀՅԴ-ն միշտ ունի իր կայուն էլեկտորատը, իսկ դրա աճը կամ նվազումը կախված է նրանից, թե ՀՅԴ-ի առաջ տարած հայդատական գաղափարները որքանով են այս կամ այն պահին արդիական և առաջնային: «Ժառանգության» լիդերի վարկանիշը մոտ 3-4 անգամ ավելի է, քան հենց կուսակցությանը»:
Ահարոն Ադիբեկյանն ընդգծեց, որ «Ժառանգություն» կուսակցությունը ստեղծված պայմաններում հաջողության կհասնի, եթե կարողանան ինչ-որ ալյանս ստեղծել և միասնաբար առաջ գնալ:
Ադիբեկյանը տեղեկացրեց, որ իրենք հետազոտություններ են անցկացրել պարզելու համար ընտրազանգվածի ներկա տրամադրությունները, ինչպես նաև ընդդիմություն-իշխանություն երկխոսության ազդեցությունը այդ տրամադրությունների վրա, և շուտով այդ տեղեկությունները կհրապարակեն: