Ռուսական լրատվամիջոցների փոխանցմամբ, Ռուսաստանն ու Վրաստանը կարող են հրաժարվել սահմանին մաքսային աշխատակիցների ներկայությունից: Աբխազիայում ու Հարավային Օսեթիայում գտնվող անցակետերի աշխատանքը կվերահսկվի տիեզերքից: Դրանցում սահմանապահներին կփոխարինեն համակարգիչները:
Էլեկտրոնային համակարգն էլ իր հերթին վերահսկվելու է տիեզերական արբանյակների կողմից: Թվային վերահսկողության տակ կհայտնվեն Աբխազիայում Պսոու գետի անցակետը, իսկ Հարավային Օսեթիայում` Ռոքյան թունելի անցակետը:
Ռուսական մամուլի հավաստմամբ` սա հանդիսանում է Թբիլիսիի ու Մոսկվայի միջև ձեռք բերված համաձայնության մի մասը: Առավել ճշգրիտ ասած` այս ամենն արվել է Առևտրի համաշխարհային կազմակերպությանը (ԱՀԿ) Ռուսաստանի անդամակցության համար:
Թբիլիսիում ռուսական մամուլի այս հրապարակումը որակել են որպես «անհեթեթություն»` պնդելով օրինական անցակետերի վրա:
Հիշեցնենք, որ Ռուսաստանն արդեն 18 տարի ապարդյուն փորձում է անդամակցել ԱՀԿ-ին: Ձևականորեն ԱՀԿ-ի անդամ երկիրը վետո դնելու իրավունք չունի, այսինքն տեսականորեն Ռուսաստանը կարող է, առանց Վրաստանի համաձայնության, անդամակցել ԱՀԿ-ին:
Սակայն ցայժմ ԱՀԿ-ում այդպիսի նախադեպ չի գրանցվել: ԱՀԿ-ն էլ կտրականապես դեմ է այդպիսի քայլին գնալու, ինչի համար էլ ամեն դեպքում Ռուսաստանը զգում է Վրաստանի աջակցության կարիքը: