Հայաստանի և Եվրամիության միջև անցած տարվա դեկտեմբերից բանակցվող փաստաթուղթը պատրաստ կլինի հնարավորինս շուտ։ «Առաջին լրատվական»-ի հետ զրույցում ասաց Հայաստանում Եվրամիության պատվիրակության ղեկավար, դեսպան Պյոտր Սվիտալսկին։ Վերջինս բանակցությունների ներկայիս փուլը նորմալ է գնահատում։
«Բանակցություններն այժմ շարունակվում են, շուտով նոր փուլ կլինի, ես կարծում եմ՝ երկու կողմերն էլ կառուցողական մոտեցում ունեն: Թեև առայժմ որոշակի ժամանակ է հարկավոր փաստաթղթի վերջնական պատրաստման համար, բայց ներկայիս փուլը, կրկնում եմ, կառուցողական է»,- նշեց նա։
Հաշվի առնելով Հայաստանի առանձնահատկությունները, Ղարաբաղյան չկարգավորված հակամարտությունը՝ դեսպանից հետաքրքրվեցինք՝ արդյոք նոր փաստաթուղթն ի վերջո կունենա՞ անվտանգության բաղադրիչ:
«Անվտանգության համագործակցության մասով կա առանձին գլուխ, և Եվրոպական միությունը պատրաստ է Հայաստանի հետ քննարկել համագործակցության կոնկրետ կետեր, բայց Հայաստանն ինքը պետք է որոշի և մեզ ասի, թե ինչ է ուզում։ Հայաստանը չի օգտագործում այժմ գոյություն ունեցող բոլոր հնարավորությունները, և մենք հույս ունենք, որ այս փաստաթուղթը կօգնի Հայաստանին՝ ավելի շատ առավելություններից օգտվել նրանից, թե ինչ է հնարավոր Եվրոպական միության հետ գործակցել անվտանգության մասով»,- ասաց Հայաստանում Եվրամիության պատվիրակության ղեկավարը։
Եվրոպական միությանն անհանգստացնում է Ղարաբաղյան չկարգավորված հակամարտությունը, ինչի պատճառով Հայաստանի սահմաններից մեկն այժմ կրակի տակ է, լրագրողների հետ զրույցում ասաց դեսպան Սվիտալսկին:
«Նորմալ չէ, որ Հայաստանի ամենաերկար սահմաններից մեկը՝ Թուրքիայի հետ սահմանը, փակ է, իսկ մյուսը, որն Ադրբեջանի հետ է, դեռ կրակի տակ է։ Բաց և խաղաղ սահմանները Հայաստանին կօգնեն առաջ ընթանալ և տնտեսական օգուտներ ստանալ, կօգնեն Հայաստանին մեծացնել զբոսաշրջությունը, ավելի շատ զբոսաշրջիկներ բերել այստեղ։ Անցած ուրբաթ ես Տավուշի մարզում էի, ինչպես գիտեք՝ շատ եվրոպական երկրներ իրենց քաղաքացիներին անգամ Դիլիջան և Իջևան չեն թողնում գնալ, որովհտեև այնտեղ ևս անվտանգ չէ։ Մենք հիմա խոսում ենք Հայաստանի ամենագեղեցիկ շրջաններից մեկի մասին, որը պետք է մեծ թվով զբոսաշրջիկների գրավեր»,- նշեց նա։
Դեսպան Սվիտալսկին հավելում է՝ նախևառաջ մենք պետք է փորձենք խաղաղ լուծումներ և կարգավորումներ գտնել Լենային Ղարաբաղի հակամարտության կարգավորման հարցում, ապա ընդգծում է՝ Եվրոպական միությունն ունի կոնկրետ ծրագրեր և ունի հատկացված գումար Հայաստանի և Ադրբեջանի ժողովուրդների միջև բարիդրացիական հարաբերություններ ստեղծելու համար։
«Գիտենք, որ քաղաքական առումով շատ դժվար է դա անել, գոյություն ունեն որոշակի նախապայմաններ, բայց մենք պատրաստ ենք ավելի ինտեսնիվ դարձնել մեր աշխատանքները, որ այդ ոլորտում հաջողության հասնենք։ Մենք ունենք նաև երկարաժամկետ և մինչ այժմ ընթացող ծրագիր, որն ուղղված է Հայաստանի և Թուրքիայի միջև հարաբերությունների լավացմանը։ Եվրոպայի հաջողությունը հիմնված է համերաշխության վրա, և մենք հուսով ենք, որ այս տարածաշրջանում նույնպես այդ համերաշխությունը կստեղծվի, համերաշխությունը մեր ինքնության մի մասն է, և եթե այս տարածաշրջանը ցանկանում է Եվրոպայի մաս կազմել, այստեղ պետք է համերաշխություն լինի»,- ասաց Հայաստանում Եվրամիության պատվիրակության ղեկավարը: