Վրացական Apsny.ge կայքի փոխանցմամբ, «Հանուն արդար Վրաստանի» շարժումը հայտարարել է, թե Ալազանի գետի վարարման պատճառով Դեդոփլիսծղարոյի շրջանի մոտ 150 հեկտար տարածք հայտնվել է ադրբեջանական կողմում (Վրաստանի արևելք-Ադրբեջանի արևմուտք):
Այս կապակցությամբ շարժման տեղական ներկայացուցիչ Շոթա Ջամասպիշվիլին հայտարարել է. «Ադրբեջանական կողմը մշտապես ափամերձ տարածքների ամրագրման աշխատանքներ է իրականացնում, ինչը չի կարելի ասել վրացական կողմի պարագայում: Դրա համար էլ սահմանային գետը փոխել է իր հունը վրացական ուղղությամբ, ինչի արդյունքում էլ Վրաստանը տարածքային կորուստներ է կրել:
Շատ շուտով ադրբեջանական բնակչությունը կյուրացնի այդ հողերը, և Վրաստանի համար դժվար կլինի դրանք վերադարձնելը»:
Հիշեցնենք, որ ապրիլի սկզբին էլ Վրաստանի «Կանաչների» կուսակցության ղեկավար Գիորգի Գաչեչիլաձեն հայտարարեց, որ Սև ծովի փոփոխությունների պատճառով Վրաստանը տարածքային կորուստներ է կրել, ինչի մեղավորը թուրքական կողմն է.
«Երբ թուրքերն ամբարտակներ կառուցեցին Ճորոխ գետի վրա, մեր ափամերձ հատվածը սկսեց կորցնել իր հիմնական նյութը` ավազն ու քարը: Դրանք այստեղ էին հասցվում Ճորոխ գետի միջոցով, որը Սև ծով է թափվում Վրաստանի տարածքում` Բաթումի մերձակայքում:
Մինչդեռ այժմ գետի վրա կառուցված ամբարտակների պատճառով դրանք մնում են Թուրքիայում, իսկ ահա, ասենք, Բաթումում ծովն ավելի է խրվում ափի մեջ: Օրինակ՝ Փոթիում ծովն արդեն առաջ է շարժվել 1 կիլոմետրով, ինչի արդյունքում այնտեղ ջրի տակ են հայտնվել մի շարք շինություններ»:
