Համաշխարհային տնտեսությունում պահպանվում են «ռիսկի և անորոշության գործոնները»։ Այս մասին ասվում է «Մեծ քսանյակի» կոմյունիկեում, որը տարածվել է Վաշինգտոնում։
TASS գործակալության փոխանցմամբ՝ փաստաթղթում նշվում է, որ իրավիճակը բարդանում է աշխարհաքաղաքական հակամարտություններով, ահաբեկչությամբ, փախստականների հոսքերով ու ԵՄ-ից Մեծ Բրիտանիայի պոտենցիալ ելքով։
Փաստաթուղթն ընդունվել է G20-ի ֆինանսների նախարարների ու կենտրոնական բանկերի ղեկավարների հերթական հանդիպման արդյունքներով, որը նվիրված է եղել ԱՄՀ և ՀԲ գարնանային նստաշրջանին։
Տագնապալի նախազգուշացումների հետ մեկտեղ՝ ֆինանսիստները փաստում են, որ գլոբալ տնտեսական առողջացումը շարունակվում է, և ֆինանսական շուկաները հիմնականում հաղթահարել են նախկինում կրած կորուստները՝ Շանհայում խմբի փետրվարյան հանդիպման ժամանակից։
Դրա հետ մեկտեղ հայտարարությունում նշվում է, որ աճը մնում է համեստ և անհավասար։ Գլոբալ տնտեսական հեռանկարների համար անորոշության գործոնները պահպանվում են ֆինանսական տատանողականության, հումքային ապրանքներ արտահանող երկրների համար մարտահրավերների ու ցածր սղաճի ֆոնին։
«Քսանյակի» երկրները խոստանում են զերծ մնալ իրենց արժույթների մրցակցային արժեզրկումից։