Չեռնոգորիայի Ուլցինժ քաղաքում ապրիլի 11-ից մեկնարկած թենիսի «Fed Cup» մրցաշարի եվրոաֆրիկյան գոտու 3-րդ խմբի «D» ենթախմբի երկրորդ տուրում հայ թենիսիստուհիները հաղթահարել են իսլանդուհիներին:
Ապրիլի 13-ին մրցաշարի շրջանակում կայացած Հայաստանի և Իսլանդիայի թենիսի կանանց հավաքականների դիմայակության ժամանակ հայուհիները մեծ դիմադրության չեն արժանացել մրցակիցների կողմից:
Հայաստան-Իսլանդիա դիմակայությունում գրանցվել է խոշոր` 3:0 հաշվով հաղթանակ Հայաստանի հավաքականի օգտին: Մրցակիցների նկատմամբ մեծ առավելությամբ մենախաղում հաղթանակներ են տոնել Անի Ամիրաղյանը և Լուսինե Չոբանյանը` համապատասխանաբար հաղաթահարելով Հերա Բրինյարսդոտիրի և Աննա Սոֆֆիա Գրոնհոլմի արգելքը:
Եթե Չոբանյանն իր մրցելույթում 16-ամյա մրցակցուհուն հաղթել է 6:1, 6:1 հաշվով, ապա Ամիրաղյանը չոր` 6:0, 6:0 հաշվով ջախջախել է 18-ամյա Բրինյարսդոտիրին: Զուգախաղում Ամիրաղյան-Չոբանյան զույգը 6:0, 6:1 հաշվով առավելության է հասել Բրինյարսդոտիր-Գրոնհոլմ խաղազույգի նկատմամբ:
«D» ենթախմբի 2-րդ` Իռլանդիա-Մակեդոնիա խաղում ամեն ինչ որոշելու է վերջնական զուգախաղը: Անչափ հետաքրքիր, գրեթե հավասար հնարավորությունների տեր թենիսիստուհիների` ապրիլի 13-ին կայացած մենապայքարից հետո առայժմ հաշիվը 1-1 է:
Ապրիլի 15-ին Հայաստանի թենիսի կանանց հավաքականն ուժերը կչափի Իռլանդիայի հավաքականի հետ: