Վրացական Apsny.ge կայքի փոխանցմամբ, Վրաստանի նախագահ Միխեիլ Սաակաշվիլին Բաթումում երեկ տեղի ունեցած ոստիկանական շքերթի ժամանակ հայտարարել է, որ հանցագործությունների քանակը Վրաստանում շատ ավելի քիչ է, քան Ռուսաստանում ու հետխորհրդային տարածքում.
«Բացի այդ, Վրաստանում առավել քիչ հանցագործություններ են տեղի ունենում, քան Գերմանիայում, Ֆրանսիայում կամ Անգլիայում: Եվ դրանք միայն թվեր չեն: Ժողովուրդը տեղյակ է, որ մենք ոստիկանական բարեփոխմանը ձեռնամուխ ենք եղել 2004 թվականին, երբ օրական առևանգում էին 30-40 ավտոմեքենա:
Մինչդեռ այսօր մարդիկ կարող են իրենց ավտոմեքենաներն այլևս չպահել փակի տակ, հանգիստ իրենց երեխաներին բաց թողնել փողոցներ: Եվ այդ ամենը հնարավոր եղավ մեր ոստիկանների շնորհիվ:
Ոստիկանների աշխատավարձերը դեռ այն չեն, ինչին նրանք իսկապես արժանի են: Այդ պատճառով էլ պետական ռեսուրսները պետք է մոբիլիզացվեն` նրանց աշխատավարձերը բարձրացնելու համար: Անհրաժեշտ է նաև բարելավել նրանց կենցաղային պայմանները, և պետությունն արդեն իսկ աշխատում է այդ ուղղությամբ»:
Հիշեցնենք, որ երեկ Վրաստանում նշվում էր ոստիկանության և Աջարիայի ազատագրման օրը: