«Նման մի հայտարարություն եղել է Ռոբերտ Քոչարյանի օրոք, երբ «Հազարամյակի մարտահրավերներ» ծրագիրը հայտարարեց, որ դադարեցնելու է միջգյուղային ճանապարհաշինության ծրագրի ֆինանսավորումը: Այն ժամանակ էլ պատասխանեց, որ այդ գումարներն այլ տեղից կգտնեն: Պատասխանն ինքնին կոռեկտ չէ, և եթե ցույց էին տալիս, որ կարող են անել, այդ դեպքում պետք է անեին»,- «Առաջին լրատվականի» հետ զրույցում կարծիք հայտնեց ՀԱԿ անդամ Վահագն Խաչատրյանը` անդրադառնալով Սերժ Սարգսյանի այն հայտարարությանը, թե Հայաստանն այլ միջոցներ կգտնի իրականացնելու Հազարամյակի մարտահրավերներ ծրագրով նախատեսված նախագծերը:
Խաչատրյանը նկատեց, որ այլ միջոցներ գտնելու տեղեր չկան, քանզի այս պահին միջազգային որևէ կազմակերպության կամ երկրի հետ ոչ մի համաձայնություն չկա: Նա նաև նկատեց, որ «Հազարամյակի մարտահրավերներ» հիմնադրամը միայն ֆինանսավորում չէր. «ՀՀ իշխանությունների դժբախտությունն էլ հենց դա էր, որ չհասկացան թե ինչի համար էր այդ ծրագիրը: Այդ ծրագրի ամենակարևոր էլեմենտը ժողովրդավարության հաստատումն էր և հասարակական սեկտորին պետական գործերի մեջ ներգրավելու խնդիրը: Բայց ՀՀ իշխանությունները դա միայն փող պատկերացրին և հենց այդ տրամաբանությամբ էլ աշխատեցին առաջին օրվանից»:
ՀԱԿ անդամը ցավով արձանագրեց, որ իշխանությունները, իրենց վարած քաղաքականությամբ հերթական անգամ տապալեցին այս ծրագիրը` ՀՀ քաղաքացիներին և հատկապես գյուղական բնակչությանը թողնելով կոտրած տաշտակի առջև:
