«Միայնակ «Ժառանգությունը» ավելի քիչ բանի կարող է հասնել, իսկ վարկանիշի հետ կապված համեստորեն կլռենք»,- ընդդիմադիր դաշտի միավորվելու հավանականությանն անդրադառնալով` հայտարարեց ԱԺ «Ժառանգություն» խմբակցության ղեկավար Ստեփան Սաֆարյանը:
Նա նաև տեղեկացրեց, որ «Ժառանգությունը» այս պահին ակտիվ քննարկումների և խորհրդակցությունների փուլում է` թե՛ ներքին և թե՛ արտաքին քաղաքական դաշտի շահագրգիռ մարմինների հետ. «Մենք ոչ միայն միշտ բաց ենք եղել, այլև շահագրգռված ենք համագործակցությունների համար: Մենք, գիտակցելով, որ ընդդիմադիր որևէ միավորում չի կարող ներկայացնել ընդդիմադիր ողջ ընտրազանգվածին, պատրաստ ենք համագործակցել»:
Դաշնակցության հետ համագործակցությունը Սաֆարյանը բացառեց: Նրա խոսքերով, այդ կուսակցության հետ համագործակցության միակ ձևաչափը խորհրդարանում կենսական հարցերի լուծման շուրջ պայքարն է:
Անդրադառնալով ՀԱԿ-ի գործունեությանը` Սաֆարյանը նշեց, որ ՀԱԿ-ի քաղաքական օրակարգում արտահերթ ընտրությունների հարց իրականում առկա չէ. «Արտահերթ ընտրությունների մասին պահանջներ առաջադրելը քարոզչական նպատակներով է արվում, ինչն, ըստ պատգամավորի, վտանգավոր երևույթ է և մոլորեցնում է հասարակությանը»:
Այդուամենայնիվ, ըստ Սաֆարյանի, Հայաստանում արտահերթ ընտրությունների նախադրյալներ կան:
ԱԺ «Ժառանգություն» խմբակցության պատգամավոր Զարուհի Փոստանջյանն էլ հավելեց, որ առկա իրավիճակում արտահերթ ընտրությունները կամ այլ արտակարգ զարգացումները չեն բացառվում, քանի որ Հայաստանն, ըստ նրա, այժմ գտնվում է արտակարգ իրավիճակում, ինչն էլ արտակարգ լուծումներ է պահանջում: