Առաջիկա շաբաթ օրը պրոֆեսիոնալ բռնցքամարտի WBO վարկածով սուպերմիջին քաշային կարգում աշխարհի չեմպիոն Արթուր Աբրահամը (44-4, 29 նոկաուտ) Լաս-Վեգասի MGM Grand համալիրում մենամարտելու է մեքսիկացի Հիլբերտո Ռամիրեսի հետ (33-0, 24 նոկաուտ):
Մենամարտը կայանալու է բռնցամարտի երեկոյի շրջանակներում, որի կենտրոնական մենամարտը լինելու է Մենի Պակյաո – Տիմոտի Բրեդլի դիմակայությունը:
«36 տարեկան եմ, ունեմ փորձ: Այնպես որ, պատրաստ եմ: Արդեն իսկ եղել եմ կարիերայիս գագաթնակետին, եղել են վերելքներ ու վայրէջքներ: Ցանկացած բռնցքամարտիկ, ով չեմպիոնի կոչման պարտադիր հավակնորդ է, թույլ լինել չի կարող: Չեմ թերագնահատում հակառակորդիս:
Լավ մարզավիճակում եմ և պատրաստվում եմ դիտարժան մենամարտ անցկացնել: Այդ է ցանկանում հանդիսատեսը»,- Աբրահամի խոսքերը մեջբերում է Boxing Scene-ը: