Ադրբեջանական Day.az կայքի փոխանցմամբ, թուրքական Ataç İnşaat ve Sanayii A.Ş ընկերությունը շահագրգռված է Վրաստանում 4 ՀԷԿ-երի կառուցմամբ: Այս մասին նշված է Վրաստանի էներգետիկայի և բնական պաշարների նախարարության ուրբաթօրյա հաղորդագրության մեջ:
Խոսքը Մագանա գետի վրա կառուցվելիք Մագանայի (20.6 մեգավատտ) և Լեկանդեի (20 մեգավատտ) ՀԷԿ-երի, ինչպես նաև Բախվիսցկալի գետի վրա կառուցվելիք Բախվի 1 (15 մեգավատտ) և Բախվի 2 (20 մեգավատտ) ՀԷԿ-երի մասին է:
Նշվում է, որ թուրքական կողմը համապատասխան հայտը Վրաստանի էներգետիկայի նախարարությանը ներկայացրել է մայիսի 4-ին: Հայտերի ընդունման ժամկետը լրանում է հունիսի 3-ին:
Հիշեցնենք, որ նախորդ տարվա աշնանը թուրքական Kolin Construction ընկերության և Վրաստանի էներգետիկայի ու բնական պաշարների նախարարության միջև կնքված պայմանագրով նախատեսվում էր, որ թուրքական ընկերությունն առաջիկա երկու տարիների ընթացքում Վրաստանում կառուցելու է 4 նոր ՀԷԿ-եր, որոնց վրա ծախսելու է 150 միլիոն դոլար: