Թենիսիստուհի Անի Ամիրաղյանը մասնակցում է թուրքական Անթալիայում ապրիլի 4-ին մեկնարկած «Tennis Organisation Cup» մրցաշարին: Թենիսի միջազգային ֆեդերացիան, հայտնում է, որ 22-ամյա թենիսիստուհին, ով ՀՀ բազմակի չեմպիոնուհի է, երկրի առաջին ռակետը, ուժերը կփորձի 10 000 ԱՄՆ դոլար մրցանակային ֆոնդ ունեցող մրցաշարում:
Մրցաշարին մասնակցությունը ուժերի ստուգման յուրատեսակ փորձ է մինչեւ ապրիլի 11-ին Չեռնագորիայում մեկնարկելիք Ֆեդերացիայաի գավաթի խաղարկությունը: Նշյալ խաղարկության 3-րդ խմբի եվրո-աֆրիկյան գոտու մրցաշարին Ամիրաղյանը պատրաստվում է ներկայացնել Հայաստանի հավաքականի մարզական պատիվը:
Ներկա պահին Ամիրաղյանը WTA դասակարգման աղյուսակում 614-րդ տեղում է, իսկ Անթալիայի մրցաշարի մասնակիցների շարքում 13-րդ ուժեղագույնն է: Այս մրցաշարում հայ թենիսիստուհին կպայքարի ոչ միայն մենախաղում, այլեւ զուգապայքարում` իրեն զուգընկեր ունենալով Ռումինիայի ներկայացուցիչ Դայանա Նեգրիանուին:
Վիճակահանության արդյունքներով հայտնի է դարձել, որ Ամիրաղյանի առաջին մրցակիցը կլինի Սլովակիայի ներկայացուցիչ Վիկտորիա Կուզմովան, ով հայուհուց բավականին բարձր վարկանիշ ունեցող մարզուհի է:
Զուգախաղում Ամիրաղյան-Նեգրիանու զույգին կդիմակայի Քերեն Շլոմո (Իսրայել) – Ալինա Վեսել (Գերմանիա) զույգը` վիճարկելու քառորդ եզրափակչի ուղեգրի իրավուքը: Ամիրաղյանը մրցելույթները կսկսի ապրիլի 6-ին:
