Վրացական Apsny.ge կայքի փոխանցմամբ, վերջին տարիների ընթացքում հանցավորության բարձր ցուցանիշներ ունեցող Վրաստանն այժմ դարձել է բավական անվտանգ երկիր: Այս մասին հայտարարել է Տիլբուրգի համալսարանի պրոֆեսոր Յան վան Դայկը.
«Այժմ Թբիլիսին կարող է համարվել աշխարհի ամենաանվտանգ քաղաքներից մեկը: Այս մասին են վկայում հասարակության շրջանում անցկացված հարցումները: Վրաստանում հանցավորության հետազոտություններն իրականացվել են Վրաստանի արդարադատության նախարարության նախաձեռնությամբ և ԵՄ-ի ֆինանսական աջակցությամբ:
Հետազոտության նպատակն էր պարզել, թե բնակչության վերաբերմունքը որքանով է համապատասխանում Վրաստանի ՆԳՆ պաշտոնական տվյալներին: Վրաստանի ՆԳՆ-ը հայտարարել էր, որ 2006-2010 թվականներին հանցագործությունների քանակը նվազել է 50 տոկոսով:
Ես ցանկանում եմ նշել, որ 2009 թվականին Վրաստանում հանցագործությունների զոհերի թիվն առավել ցածր է եղել, քան որևէ եվրոպական երկրում»:
Հիշեցնենք, որ այսօր Վրաստանում նշում են ոստիկանության օրը, և այդ կապակցությամբ Բաթումում կայանալու է մեծ շքերթ, որին ներկա է գտնվելու նաև նախագահ Սաակաշվիլին:
