Ադրբեջանական 1news.az կայքի փոխանցմամբ, Պակիստանի նախագահ Ասիֆ Ալի Զարդարին հանդիպում է ունեցել Ադրբեջանում Պակիստանի նորանշանակ դեսպան Ինյաթուլլահ Քաքարիի հետ:
Հանդիպման ժամանակ Պակիստանի նախագահը նորանշանակ դեսպանին կոչ է արել ուշադրություն դարձնել երկու երկրների միջև տնտեսական, առևտրային և ներդրումային ոլորտներում երկկողմանի հարաբերությունների զարգացմանը:
Պակիստանի նախագահը նաև հայտնել է իր շահագրգռվածությունը պակիստանյան արտադրանքն Ադրբեջան արտահանելու գործում:
Քաքարին հավաստիացրել է, որ բոլոր ջանքերը կգործադրի երկու երկրների հարաբերությունների զարգացման համար:
Հիշեցնենք, որ Ադրբեջանի նախագահ Իլհամ Ալիևը Զարդարիին հրավիրել է այցելել Ադրբեջան, ինչն ընդունվել է վերջինիս կողմից:
