«Սարդարապատ» շարժման նախաձեռնող խմբի ղեկավար, Շուշիի առանձնակի գումարտակի հրամանատար Ժիրայր Սեֆիլյանը, անդրադառնալով Շուշիի ազատագրման օրվան, ասաց, որ արդեն երկար ժամանակ է՝ շատերի համար այդ օրը տոն չէ, որովհետև, Սեֆիլյանի խոսքերով՝ «զինադադարից հետո մեզ չհաջողվեց ստեղծել մի այնպիսի երկիր, որտեղ ժողովուրդը կարողանար արժանապատիվ ապրել: Այսօր եթե տոնվում է այդ օրը, ապա դա ձև է` բովանդակությունից դուրս»:
Սեֆիլյանը նկատեց, որ իր ասածներն ապացուցում է նաև այն փաստը, որ Սասուն Միքայելյանը մի քանի տարի է՝ այս օրն անցկացնում է բանտում, այն էլ՝ վրեժխնդրության պատճառով:
Հարցին, թե ազատագրված տարածքների վերաբնակեցումը ի՞նչ պայմաններում և ե՞րբ կարելի է լիարժեք համարել, Սեֆիլյանը պատասխանեց. «Այսօր ոչ միայն ազատագրված տարածքները չեն վերաբնակեցվում, այլև մեր երկիրն է դատարկվում, Ղուկասյանից մինչև Մեղրի, Հադրութից` Մարտակերտ: Ավելին, Շուշին կարելի է համարել մեր ազգի հայելին, սակայն ազատագրումից 19 տարի հետո էլ այնտեղ որևէ բան չի փոխվել, և եթե այսօր գնաք Շուշի, ձեզ կթվա, թե ուրվականների քաղաքում եք գտնվում»:
Սեֆիլյանն ընդգծեց, որ այսօր չափազանց կարևոր է մեկ գաղափարի՝ միասնական և ազգային գաղափարի շուրջը համախմբվելը, քանզի վիճակը օր-օրի վատթարանում է, և հայ ժողովրդի 80 տոկոսի աչքը դեպի դուրս է։ Այս ահավոր պատկերը մեզ պետք է զգաստացնի»:
