Արաբագետ Սարգիս Գրիգորյանը «Առաջին լրատվական»-ի հետ զրույցում մարտի 22-ին տեղի ունեցած Բրյուսելի ահաբեկչությունները համարում է նոյեմբերի 13-ի փարիզյան ահաբեկչությունների շարունակություն, քանի որ երկու դեպքերում էլ ահաբեկչությունը ստանձնեց «Իսլամական պետությունը»:
«Այսինքն՝ հիմա հերթը Բելգիայինն է, հետագայում հնարավոր է՝ այլ հատվածներում տեղի ունենա ահաբեկչություն: Հիմնականում հայտարարված է պատերազմ Արևմուտքին: Նրանք սա համարում են ջիհադական, ազատագրական սրբազան պատերազմ՝ ուղղված իսլամի գերիշխմանը ամբողջ աշխարհում»,- կարծիք հայտնեց արաբագետը:
Սարգիս Գրիգորյանը ահաբեկչական ակտերը չի կապում սիրիացի կամ իրաքցի փախստականների, ներգաղթյալների հետ. «Ավելին՝ հնարավոր է, որ այդ ահաբեկչություններն իրականացնեն «Իսլամական պետության» կամ այլ խմբավորման հետ կապ չունեցող մարդիկ»:
Արաբագետի կարծիքով՝ եթե Եվրոպան խելամիտ գտնվի և տուրք չտա զգացմունքային դրսևորումներին՝ ի դեմս հակաիսլամական տրամադրությունների աճի, որոշ չափով հնարավոր կլինի հանդարտեցնել իրավիճակը, իսկ հակառակ դեպքում Եվրոպայում կառաջանան խուճապային տրամադրություններ, ինչին էլ ձգտում են իսլամիստները. «Իսկ դա իրենց շարքերը համալրելու հնարավորություն կտա»:
