«ԱՄՆ-ը նպատակ է դրել վերջ տալ ազգային կողոպուտի համակարգին, ինչն օգուտ է մեզ, բայց դրանով ձեռք են բերվում նաև երկիրը կառավարելու համար քաղաքական լծակներ, ինչն արդեն հակասում է մեր երկրի շահերին»,- այսօր լրագրողների հետ հանդիպման ժամանակ կարծիք հայտնեց «Ղարաբաղ» կոմիտեի անդամ Աշոտ Մանուչարյանը` խոսելով Հայաստանում տեղի ունեցող քաղաքական զարգացումների մասին:
Նրա կարծիքով, մեզանում կատարվող զարգացումները պայմանավորված են ԱՄՆ-ի սկսած տրանսֆորմացիոն գործընթացով: Ըստ Մանուչարյանի` այդ տրանսֆորմացիան ենթադրում է երկրում տիրող իրավիճակի փոփոխություն, սակայն ի տարբերություն հեղափոխականի, այստեղ փորձում են մեծ թվով գործող անձանց ներառել. «Այս գործառույթը ներառում է անցնցում փոփոխություններ և ներկայացնում է փոփոխությունների ամբողջ պալիտրան»:
Համեմատելով Վրաստանում կատարված տրանսֆորմացիոն երևույթների հետ` Մանուչարյանը նշեց, որ Հայաստանում չի ենթադրվում հեղափոխություն իրականացնել, ինչպես Վրաստանում: Նա նաև հավելեց, որ այդ տրանսֆորմացիաների համար երկրները վճարում են. «Վրաստանն իր քաղաքական բարեկեցության համար վճարեց Օսեթիայով և Աբխազիայով, իսկ թե ինչ կվճարի Հայաստանը` դեռ հայտնի չէ»:
Մանուչարյանը նկատեց, որ ԱՄՆ-ը դրանով նպատակ է հետապնդում մի կողմից ունենալ կառավարելի, մյուս կողմից էլ՝ նոր աշխարհին ավելի համապատասխան երկիր: Մանուչարյանն ընդգծեց, որ ԱՄՆ տրանսֆորմացիոն այս գործառույթն իրականացվում է ԱՄՆ նախկին պետքարտուղար Մադլեն Օլբրայթի մեթոդով: «Այսօր ունենք աշխատանքից ազատված նախկին քաղաքապետ, ոստիկանության հզոր աշխատակից, որը կալանավորված է, և վերաբացված մարտի մեկ, որն ամենաֆանտաստիկ բանն է»,- ասաց Մանուչարյանը՝ հավելելով, որ տրանսֆորմացիայի գործընթացին զուգահեռ` Հայաստանի իշխանությունը գտնվում է թուլացած և բզկտված վիճակում:
Աշոտ Մանուչարյանը նաև նկատեց, որ ընթանում է մի այնպիսի գործընթաց, երբ մի քանի նախագահներ կանգնելու են միջազգային դատարանի առաջ. «Միանշանակ է, որ Հայաստանը կարող է հարստացնել այդ ցուցակը, սակայն ումով` ես չգիտեմ: Անմեկնելի են Աստծո և Միացյալ Նահանգների գործերը»:
