Վրացական Apsny.ge կայքի փոխանցմամբ, կոռուպցիայի խնդիրներին առնչվող Transparency International կազմակերպության 2011 թվականի հաշվետվության մեջ նշված է, որ Վրաստանի դատական համակարգը և հանրային սեկտորը բավականաչափ անկախ չեն:
Հանրային սեկտորի քաղաքականացման բարձր մակարդակը խոչընդոտում է այդ ոլորտի զարգացմանը: Զեկույցում վրացական իշխանություններին կոչ է արվում շարունակել կոռուպցիայի դեմ պայքարում ունեցած հաջողությունները: Այդ տեսանկյունից անհրաժեշտ է առավել թափանցիկություն ու անկողմնակալություն թե՛ օրենսդրությունում, թե՛ այդ օրենքները կյանքի կոչելու հարցում:
Վերջին մեկ տարվա ընթացքում Վրաստանը, ի տարբերություն հարևան Հայաստանի ու Ադրբեջանի, որոշակի առաջընթաց է գրանցել, ինչն առավել ակներև է տեխնիկական և մասնավորապես էլեկտրոնային գնումների ոլորտում:
Հիշեցնենք, որ ԱՄՆ Պետդեպարտամենտի 2010 թվականի «Մարդու իրավունքների» զեկույցում նշված էր, որ, թեև 2003 թվականից հետո Վրաստանը որոշակի առաջընթաց է գրանցել կոռուպցիայի դեմ պայքարում, այնուամենայնիվ, այն դեռ շարունակում է խնդիր մնալ, քանի որ իշխանության ներկայացուցիչները շարունակում են անպատիժ մասնակցել բարձր մակարդակի կոռուպցիոն գործընթացներին:
