«Առավել տրամաբանական է ռուսական ռազմատեխնիկան և անձնակազմը Հայաստանում գտնվող ռազմաբազա հասցնել կամ Թուրքիայի, կամ էլ Իրանի տարածքով»,- անդրադառնալով ռուսական ռազմական տրանզիտը փակելու մասին Վրաստանի խորհրդարանի որոշմանը, «Առաջին լրատվականի» հետ զրույցում կարծիք հայտնեց Քաղաքական և ռազմական վերլուծությունների ինստիտուտի ռազմական կանխատեսումների կենտրոնի ղեկավար, պահեստազորի գնդապետ Անատոլիյ Ցիգանոկը:
Ըստ Ցիգանոկի, Թուրքիան, որն իրականում դրդում է Վրաստանին Ռուսաստանի հետ հարաբերությունների հետագա վատացման, կարող է համաձայնվել սեփական տարածքով ապահովել ռուսական տրանզիտ դեպի Հայաստան: Սակայն, Ցիգանոկի խոսքերով, այդ համաձայնությունը Թուրքիային հնարավորություն կտա վերահսկողության տակ վերցնել այդ տրանզիտը, իսկ անհրաժեշտության դեպքում նաև փակել այն: Այդուամենայնիվ, փորձագետն ընդգծեց նաև, որ Թուրքիան միակ երկիրն է, որը հնարավորություն չի տալիս ամերիկյան ռազմաօդային ուժերին գործել Սև ծովի տարածքում:
Մեր հարցին, թե այդ համաձայնության դիմաց ինչ կարող է պահանջել Թուրքիան, Ցիգանոկը պատասխանեց. «Թուրքիան ցանկանում է տարածաշրջանային հարցերում առավել գերիշխող լինել: Հնարավոր է նաև, որ Թուրքիան պահանջի ստեղծել հեղուկացված գազի գործարան, քանզի այդ հարցի շուրջ քննարկումներն արդեն ութ տարի է շարունակվում է»:
