5 մայիսի 2011թ., Երևան: Ներքաղաքական և ներհասարակական զարգացումների լույսի ներքո այսօր Ռազմավարական և ազգային հետազոտությունների հայկական կենտրոնում (ՌԱՀՀԿ) տեղի ունեցավ հերթական սեմինար-քննարկումը, որի թեման էր` «Հայաստան. հանրային պահանջ և ներքաղաքական առաջարկներ»:
Հրավիրված էին ՀՀ-ում հավատարմագրված դիվանագիտական առաքելությունների և միջազգային կառույցների ներկայացուցիչներ, քաղաքագետ-վերլուծաբաններ, փորձագետներ և լրագրողներ:
Սեմինարը բացեց ՌԱՀՀԿ տնօրեն Մանվել Սարգսյանը` ակնկալելով շահագրգիռ և համակողմանի քննարկում: «Այսօրվա մեր նպատակն է փորձել հասկանալ, թե որքանով են հայաստանյան գործընթացները համապատասխանում հասարակության սպասելիքներին և վարվող բանավեճի տրամաբանությանը»,- նշեց Սարգսյանը:
Հանրության տարբեր շերտերում առկա դիսկուրսի առանցքային դիտանկյունները շոշափեց և հետխորհրդային կարծրատիպերի ու անկախության մարտահրավերների էությունը վերհանեց պատմական գիտությունների թեկնածու, ազգագրագետ Աղասի Թադևոսյանը: Բանախոսն անդրադարձավ շահերի ու հետաքրքրությունների այն շրջանակին, որ ներկայացնում են օլիգարխիկ դասը, մանր ու միջին ձեռներեցները, երիտասարդության նորովի մտածող հատվածը, «անդեմ հասարակություն» կոչված շերտը և այլք: Նրանց մի մասը, ըստ Թադևոսյանի, գիտակցում է սեփական շահերը, սակայն չի տեսնում դրանց իրացման գործիքակազմը, մյուսները հակառակը` ունակ են ընդհանրական ու կազմակերպված ձև տալ իրենց տեսլականին:
«Հասարակության առջև ծառացած հիմնական խնդիրը շերտավորման գործընթացի խրախուսումն է, այսինքն` միատարր ազգայնական հանրույթից շերտավորված հասարակության անցնելու հրամայականը»,- ընդգծեց զեկուցողը:
Նույն հարթության մեջ ՌԱՀՀԿ տնօրենը սահուն անցում կատարեց ներկա պահի քաղաքական զարգացումներին` նկատելով, որ քաղաքական վերնախավը մեզանում երկար տարիներ գործում էր լոկալ և ազատ տարածքում` հասարակության ներուժը ծառայեցնելով իր խնդիրների լուծմանը: Սակայն վերջին շրջանում, ինչպես ողջ արաբական աշխարհում, ՀՀ-ում ևս հասարակությունը, Սարգսյանի խոսքով, սկսեց բարձրաձայնել երկրի զարգացման մասին ունեցած պատկերացումները և իր պահանջներն առաջադրել քաղաքական ուժերին, մասնավորապես` ընդդիմությանը: Արդյունքում կարևորվեց արդար ընտրությունների միջոցով իշխանության ձևավորման շուրջ բանավեճը:
«Ընդդիմադիր դաշտում «խարիսխ ձգած» ամենահետադիմական երևույթը, որ այսօր նկատելի է ընդդիմության տարբեր թևերի ներկայացուցիչների շրջանում, իշխանությանը ծառայելու, նրա պատվերները կատարելու մեջ միմյանց մեղադրելն է: Եվ ամենազարմանալին այն է, որ այդ դաշտում սկսել են գերիշխել բոլոր տեսակի երևույթների ավտորիտար ընկալումները»,- ասաց ՌԱՀՀԿ տնօրենը` նշելով, որ երրորդ ուժի անհրաժեշտության մասին խոսակցությունը նույնպես ավտորիտար մոտեցումների արդյունք է:
Քննարկման ընթացքում և ավարտին ծավալված հարցուպատասխանին ու մտքերի փոխանակությանը մասնակցեցին իրավագետ Անդրեաս Ղուկասյանը, Ռուսաստանի աշխարհաքաղաքական հիմնախնդիրների ակադեմիայի փոխնախագահ Արայիկ Սարգսյանը, կառավարման ոլորտի փորձագետ Հարություն Մեսրոպյանը, ՀՌԱԿ ատենապետ Էդվարդ Անտինյանը, Մարդու իրավունքների և ժողովրդավարության ինստիտուտի (ՄԻԺԻ) ՀԿ նախագահ Արփինե Գալֆայանը, ՌԱՀՀԿ փորձագետ Էդգար Վարդանյանը, քաղաքագետ Արթուր Ավթանդիլյանը և ուրիշներ:
Ռազմավարական և ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան և Սփյուռքի աջակիցների լայն շրջանակների զորակցությանը: Հետևելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձևավորող և միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության և ազգի համար վճռորոշ՝ ներքին ու արտաքին քաղաքականությունների կիրառական հետազոտությանը:
