ԵՄ քաղաքական առաջնորդները բառացիորեն «ծախեցին հոգիները»՝ հանուն միգրացիոն հարցով Թուրքիայի հետ «վանող» և միաժամանակ «բավական թույլ» համաձայնագիր կնքելու հնարավորության: Այս մասին ասվում է Financial Times թերթի կայքում հրապարակված հոդվածում:
Պարբերականի վերլուծաբաններից մեկը Բրյուսելի գործարքն Անկարայի հետ անվանում է «թերևս ամենավանողը» այն ամենից, ինչ վերջերս տեղի է ունեցել քաղաքականության մեջ: «Այդ օրը ԵՄ-ն ոչ միայն ծախեց իր հոգին, այլև իրականում բավական թույլ գործարք կնքեց»,- ասվում է հոդվածում:
Հաղորդվում է, որ փաստաթուղթը, որը հազիվ թե համապատասխանում է Ժնևյան կոնվենցիային և միջազգային իրավունքի նորմերին, ամենայն հավանականությամբ, կվիճարկվի դատարանում: «Բայց նույնիսկ եթե համաձայնագիրն օրինական ճանաչվի, կասկածելի է, որ այն կհաջողվի իրագործել»,- նշում է թերթը, որը հարցնում է՝ արդյոք ԵՄ-ն այդ դեպքում կհրաժարվի՞ Անկարային տված իր խոստումներից:
Սակայն ըստ Financial Times-ի՝ Թուրքիայի հետ գործարքն ամեն դեպքում չի կարողանա «լրջորեն թուլացնել ճնշումը» Եվրոպայի վրա՝ փախստականների թվի շարունակվող աճի պատճառով: Ուստի դրա պրակտիկ արժեքը ձգտում է զրոյի, իսկ Անկարայի մեծաթիվ առավելությունները, այդ թվում՝ ԵՄ-ի հետ առանց վիզայի ռեժիմը միայն կնպաստեն միության հետագա բեկորացմանը:
«Ցանկացածը, ում համար թանկ են ժողովրդավարությունն ու մարդու իրավունքները, կատի այդ գործարքը»,- եզրափակում է Financial Times-ը: