Իրանի եւ Ուզբեկստանի արտգործնախարարներ Մանուչեհր Մոթաքին եւ Վլադիմիր Նորովը «Համագործակցության ասիական երկխոսություն» կազմակերպության՝ Թեհրանում կայացած նիստի շրջանակներում քննարկել են երկու երկրների միջեւ համագործակցության զարգացման հարցերը: Նրանք, մասնավորապես, նշել են, որ կողմերը հնարավորություն ունեն զարգացնելու գործակցությունը տրանսպորտային հաղորդակցությունների եւ տարանցիկ բեռնատար փոխադրումների բնագավառում:
Ուզբեկստանի արտաքին տնտեսական կապերի, ներդրումների ու առեւտրի նախարարության տվյալներով՝ տրանսպորտային ենթակառուցվածքի զարգացումը երկու երկրների առեւտրատնտեսական հարաբերությունների ողջ համալիրի հիմքն է: Իրանը կայունորեն տեղ է զբաղեցնում Ուզբեկստանի տասը առաջատար տնտեսական գործընկերների թվում: 2009թ. արդյունքներով՝ երկու երկրների միջեւ ապրանքաշրջանառությունն աճել Է 1 տոկոսով՝ մինչեւ 572,7 մլն դոլար, իսկ ընթացիկ տարվա հունվար-մարտին՝ 79,7 տոկոսով՝ մինչեւ 151,3 մլն դոլար: Ուզբեկստանում գործում են ուզբեկա-իրանական շուրջ 200 համատեղ ձեռնարկություններ: