«Ես շատ ցավում եմ, որ Ֆրանսիայի սենատը մերժեց այդ օրինագիծը և ինձ համար անընդունելի են Սենատի դահլիճում արդարադատության նախարարի հնչեցրած հիմնավորումները, թե այդ օրինագծի ընդունումը կարող է վտանգել խոսքի ազատությունը: Ի վերջո, նույն Սենատը ընդունել է Հոլոքոստի հերքման համար քրեական պատասխանատվության ենթարկելու մասին օրինագիծը և, չգիտես ինչու, այն ժամանակ խոսքի ազատության հետ կապված որևէ խնդիր չկար»,- անդրադառնալով Ֆրանսիայի սենատի երեկվա որոշմանը`մերժել Հայոց ցեղասպանության հերքումը քրեականացնող օրինագիծը` «Առաջին լրատվականի» հետ զրույցում կարծիք հայտնեց ԱԺ արտաքին հարաբերությունների մշտական հանձնաժողովի անդամ Նաիրա Զոհրաբյանը:
Պատգամավորի գնահատմամբ, նման օրինագծի ընդունումը որևէ կերպ չի կարող դիտարկվել խոսքի ազատության սահմանափակման տեսանկյունից. դրանք բոլորովին իրար հետ առնչություն չունեցող հարթություններ են: Զոհրաբյանը շնորհակալություն հայտնեց այն 74 սենատորներին, որոնք, այդուհանդերձ, կողմ են քվեարկել նախագծին. «Ես վստահ եմ, որ ֆրանսիացի մեր բարեկամ պատգամավորներն ամեն ինչ արել են, որ այս օրինագիծն ընդունվի»:
Զոհրաբյանը համաձայն չէ, թե Ցեղասպանության հարցում Ֆրանսիայի քաղաքական գիծը ինչ-որ փոփոխություններ է կրել. «Համենայնդեպս չեմ ուզում հավատալ»:
Նա նշեց, որ օրինագծի մերժումն ավելի շատ կապված է ադրբեջանա-թուրքական լոբբինգի հետ. «Սենատում կան ադրբեջանական եւ թուրքական շահերը սպասարկող բավականին լուրջ խմբավորումներ, և այս քայլը կարելի է նրանց լոբբինգի հետևանք համարել»: