Վրացական Apsny.ge կայքիփոխանցմամբ, Ռուսաստանի Անվտանգության դաշնային ծառայությունը (ԱԴԾ) քաղաքացիական դիմակայություն է պատրաստում Վրաստանում: Այս մասին հայտարարել է «Ազատ մտքի տուն» հկ նախկին ղեկավար էլիսո Կիլաձեն.
«Ռուսական սցենարի համաձայն` Վրաստանում բռնկվելու է քաղաքացիական պատերազմ: Իմ տվյալներով` նախորդ տարվա ուշ աշնանը Վրաստանի պաշտպանության նախկին նախարար Իրակլի Օկրուաշվիլին ԱԴԾ-ի պետ Ալեքսանդր Բորտնիկովի առաջադրանքով մեկնել է Մոսկվա: Այնտեղ նա հանդիպում է ունեցել բանակի գեներալ-գնդապետ Սերգեյ Բեսեդայի հետ:
Հենց այդ հանդիպման ժամանակ էլ վճռվել է Վրաստանում ձևավորել նոր քաղաքական ուժ, որը կմիավորեր տարբեր մոտեցումներ ունեցող անձանց: Ավելի ուշ այդ ուժը դարձավ «Վրացական կուսակցությունը», որը պետք է համակարգի «Մխեդրիոնիի» (վրացական ռազմականացված ազգայնական կազմակերպություն) նախկին զինյալների, աբխազական պատերազմի վետերանների գործողությունները:
Երկու օր առաջ կայացել է Օկրուաշվիլիի ու Բեսեդայի նոր հանդիպումը, ուր և վճռվել է, որ «Վրացական կուսակցությունը» իր ելույթները պետք է սկսի նախքան «ժողովրդական հավաքի» ակցիան: Բացառված չէ, որ կկազմակերպվեն մի շարք սադրանքներ, կհայտնվեն զինված անձինք, որոնք ճանապարհ կհարթեն Թբիլիսիից 40 կմ հեռավորության վրա տեղակայված ռուսական բանակի համար»:
Հիշեցնենք, որ ապրիլի սկզբին Վրաստանի փոխվարչապետ, եվրոինտեգրման հարցերով պետնախարար Գիորգի Բարամիձեն հայտարարեց, որ Ռուսաստանը դեռևս շարունակում է Վրաստանին առնչվող ագրեսիվ պլաններ պահպանել.
«Վրաստանում գոյություն ունեն ընդդիմադիր ուժեր, որոնք մտադիր են անկարգություններ ու բախումներ կազմակերպել այն հույսով, որ վերջին պահին Ռուսաստանը կմիջամտի գործին և նրա զորքերի օգնությամբ կարելի կլինի տապալել վրացական գործող իշխանություններին»: