Վրացական Apsny.ge կայքի փոխանցմամբ, արտաքին քաղաքականության գերմանական խորհրդի Ռուսաստանի ու Եվրասիայի ծրագրերի ղեկավար Ալեքսանդր Ռարն անդրադարձ է կատարել Վրաստանում հնարավոր հեղափոխության մասին շրջանառվող լուրերին.
«Վրաստանը մեծ հաջողություններ է արձանագրել տնտեսական ոլորոտում` սկսած կոռուպցիայի դեմ հաջող պայքարից, վերջացրած տնտեսության տաբեր ճյուղերի զարգացմամբ: Վրաստանում բնակվող մարդիկ զգում են, որ իրենք ապագա ունեն: Այդ դրական մոտեցումն էլ մարդկանց համախմբում է նախագահ Միխեիլ Սաակաշվիլիի ճամբարում:
Ինչ վերաբերում է վրացական ընդդիմությանը, ապա նրա գլխավոր խնդիրը միացյալ առաջնորդ չունենալն է: Վրաց ընդդիմադիրները չեն կարողանում պայմանավորվել միմյանց հետ, առաջ են քաշում սեփական պահանջները և յուրաքանչյուրը ցանկանում է առաջնային դեր խաղալ: Ընդդիմադիր խմբերի ներսում ներքաղաքական պատերազմներ են ընթանում:
Իշխանություններն էլ շահում են դրանից` խաղալով ընդդիմության տարաձայնությունների վրա: Ուստի Վրաստանում չպետք է հեղափոխություն ակնկալել: Հնարավոր է` բողոքական տրամադրությունները սրվեն, սակայն դա տեղի կունենա ոչ թե շուտով, այլ 2013 թվականի նախագահական ընտրությունների նախաշեմին»:
Հիշեցնենք, որ վրացական ընդդիմության զանգվածային բողոքի ակցիաները նշանակված են մայիսի 21-ին: Իսկ խորհրդարանի նախկին խոսնակ Նինո Բուրջանաձեն հայտարարել է, որ այս տարվա ամառը վերջինն է լինելու Սաակաշվիլիի համար:
