Արձագանքելով 12-ամսյա կտրվածքով ավելի քան 9-տոկոսանոց գնաճին` ԱԺ ԲՀԿ-ական պատգամավոր Վարդան Բոստանջյանը առաջարկեց այդ հարցը ուղղել այն մարդկանց, ովքեր դրանց տերն են, սակայն չկարողացավ նշել, թե ովքեր են դրա տերը: Ապա ավելացրեց, որ ամեն դեպքում հասարակ պատգամավորը տեր չէ դրան: Իսկ ՄԱԿ նախագահ Գուրգեն Արսենյանն էլ շտապեց ավելացնել, որ իր նման սովորական քաղաքացին էլ տեր չէ: Անցում կարատելով պանրի թանկացման մասին հարցին` Գուրգեն Արսենյանն ավելացրեց, որ պանիր սիրում են մեկ հայերը, մեկ էլ՝ մկները: Հետեւաբար` պանիրը թանկանա-չթանկանա, պետք է ուտեն: Խոսելով բյուջեի ծախսերի մասին` Վարդան Բոստանջյանը նշեց, որ այն 2011թ. կհասնի 1 տրիլիոն դրամի: «Շատ հնարավոր չէ գնահատել, քանի որ բազմաթիվ ուղղություններ մեր երկրում զարգացման անհրաժեշտություն ունեն: Բայց ավելի հնարավորություններ չունենք»: Գուրգեն Արսենյանը ակնարկեց, որ Վարդան Բոստանջյանը ճիշտ թվերով չի խոսում, ինչին ի պատասխան` ԲՀԿ-ական պատգամավորը արձագանքեց. «Արսենյա¬՛ն, արի մի վիճի հետս, որովհետեւ ես սխալ բան չեմ ասում»: Ի դեպ, մենք ճշտեցինք, որ 2011թ. կանխատեսված ՀՀ բյուջեի ծախսերը իրականում մոտ են Վարդան Բոստանջյանի հրապարակած թվին: Նախնական հաշվարկներով այն կլինի 998,6 մլրդ դրամ: