«Առաջին լրատվական»-ի տեղեկություններով՝ Վարդան Սեդրակյանի գործի հետ կապված է նաև Արմեն Զալինյանը՝ ԼՂՀ նախկին զինվորական դատախազը, ԼՂՀ նախագահի նախկին խորհրդականը: Նա տարիներ շարունակ մտերիմ կապերի մեջ է եղել Վարդան Սեդրակյանի հետ: Ըստ որոշ տեղեկությունների՝ նա սերտ կապեր ունի նաև Ռուսաստանի որոշ քաղաքական ուժերի հետ: Հայտնի է, որ Սեդրակյանը քաղաքական իր քայլերը կատարելիս հաճախ խորհրդակցել է հենց Զալինյանի հետ, ստացել տեղեկություն հայաստանյան քաղաքական վերնախավի խնդիրների, երկրում տիրող իրավիճակի, կոնկրետ պաշտոններ զբաղեցնող անձանց իրավիճակի և դիրքորոշման վերաբերյալ:
Սեդրակյանն ու Զալինյանը ունեն նաև ֆինանսական կապեր. Զալինյանը զբաղվում է Հայաստան դեղամիջոցներ ներկրելով:
«Առաջին լրատվական»-ը զրուցեց Վարդան Սեդրակյանի փաստաբան Ալեքսանդր Սիրունյանի հետ: Հարցին՝ ի՞նչ կապ ունի Զալինյանը Սեդրակյանի և Պ. Հայրիկյանի դեմ կազմակերպված մահափորձի հետ, փաստաբանը պատասխանեց. «Ի՞նչ կապ կարող է ունենալ, եթե անգամ Սեդրակյանը կապ չունի: Այո, Զալինյանն ու Սեդրակյանը ոչ թե ընկերներ, այլ բարեկամներ են, սակայն դա ոչ մի կապ չունի մահափորձի կազմակերպման հետ»:
Նա չհերքեց, որ Սեդրակյանն ու Զալինյանն իրար հետ ճանապարհ են անցել, սակայն համոզված է՝ Սեդրակյանի անմեղությունը կապացուցվի:
Նշենք, որ Զալինյանին իր պաշտոններից ԼՂՀ-ում հեռացրել են կաշառակերության, առանձնակի մեծ չափերի գումարներ շորթելու պատճառով, ինչի համար էլ նա դժգոհ է ներկա իշխանություններից: Հնարավոր է, որ հենց ինքն է խորհուրդ տվել Սեդրակյանին սպանություն կազմակերպել Պ. Հայրիկյանի նկատմամբ՝ ընտրությունները հետաձգելու համար և դրանով ծանր դրության մեջ դնելով Հայաստանի իշխանական վերնախավին:
Այժմ Զալինյանը ակտիվորեն մասնակցում է Սեդրակյանի պաշտպանության հարցերով:
Լուսանկարը` PanARMENIAN Photo-ի
