Ինչպես այսօր գրում է ռուսական Коммерсант-ը, Սանկտ Պետերբուրգի օրենսդիր մարմինը որոշում է կայացրել մայիսի 18-ին քննարկել Ռուսաստանի Դաշնային խորհրդի նախագահ Սերգեյ Միրոնովի լիազորությունների դադարեցման հարցը:
Այս նախաձեռնության հեղինակ է դարձել երկրորդ մայրաքաղաքի օրենսդիրների ղեկավար Վադիմ Տյուլպանովը, որը ներկայացնում է «Եդինայա Ռոսիա» կուսակցությունը: Իր որոշումը Տյուլպանովը բացատրել է այն հանգամանքով, որ Միրոնովը վերջերս պահանջել է Սանկտ Պետերբուրգի նահանգապետ Վալենտինա Մատվիենկոյի հրաժարականը:
Իշխող «Եդինայա Ռոսիա» կուսակցությունում թերթի աղբյուրը ասել է, թե շատ մեծ է մայիսի 18-ին Միրոնովի պաշտոնանկության հավանականությունը: Ավելին` քվեարկությունը կրելու է ցուցադրական բնույթ: Սանկտ Պետերբուրգի օրենսդիրների նման «պատրաստակամությունը» պայմանավորված է այն բանով, որ հենց նրանք են Միրոնովին գործուղել Դաշնայի խորհուրդ, ինչից հետո էլ նա դարձել է խորհրդի նախագահ:
Հիշեցնենք, որ Միրոնովին պատժելու «անհրաժեշտությունն» առաջացել է այն ժամանակ, երբ նա սկսել է կտրուկ քննադատության ենթարկել իշխող կուսակցությանը` հայտարարելով, թե չի պաշտպանի նրա կողմից առաջադրված նախագահի թեկնածուին: Այսօրինակ գործողությունները Ռուսաստանում ենթակա են խիստ դատապարտման` դրանից բխող բոլոր հետևանքներով:
