Ադրբեջանական Anspress.com կայքի փոխանցմամբ, Ռուսաստանի Կասպից նավատորմը մինչև 2020 թվականը համալրվելու է 16 նոր ռազմանավերով: Այս մասին հայտարարել է Ռուսաստանի ռազմածովային ուժերի գլխավոր հրամանատար Վլադիմիր Վիսոցկին: Հեռանկարում «Հարավ» հրամանատարության հաշվին Կասպից ծովում ձևավորվելու են նոր առափնյա հրթիռային զորամիավորումներ ու ավիացիոն խմբեր:
Այս տարի Կասպից նավատորմը կհամալրվի «Թաթարստան» և «Վոլգոդոնսկ» նոր հրթիռային մոտորանավակներով:
Պլանավորված է Մախաչկալայում հիմնել նոր նավամատույցներ, որոնք Կասպյան նավատորմին հնարավորություն կընձեռեն կայանավորվել Աստրախանում ու Մախաչկալայում:
Հիշեցնենք, որ 1992 թվականին խորհրդային Կասպից նավատորմիղը բաժանվեց 4 հավասար մասի (յուրաքանչյուրին՝ 25 %): Սակայն Ղազախստանն ու Թուրքմենստանն անմիջապես հրաժարվեցին իրենց բաժնեմասերից հօգուտ Ռուսաստանի: Ադրբեջանը, սակայն, այդպես չվարվեց:
Փաստորեն, Ռուսաստանին բաժին հասավ ռազմանավերի 75 %-ը, Ադրբեջանին` 25%-ը: Բաժանումից հետո Ռուսաստանի Կասպից նավատորմիղը, խորհրդայինի համեմատ, կորցրեց 18 ռազմանավ, 62 օժանդակ նավ, 3 հենակետ և մարտական նախապատրաստության 18 շրջան:
