Հայ ազգային կոնգրեսի առաջնորդը այսօր անակնկալ է մատուցել քաղբանտարկյալ Սասուն Միքայելյանին` այցելելով և տեսակցելով նրան «Դատապարտյալների հիվանդանոց» ՔԿՀ-ում: Տեր-Պետրոսյանը շուրջ մեկ ժամ խոսել է Սասուն Միքայելյանի հետ: Կոնգրեսի առաջնորդը արդարադատության նախարարությանն էր դիմել Սասուն Միքայելյանին և Նիկոլ Փաշինյանին հանդիպելու թույլտվություն ստանալու համար: Այսօր էլ Տեր-Պետրոսյանը «Արթիկ» քրեակատարողական հիմնարկում հանդիպելու է Նիկոլ Փաշինյանի հետ: Պետք է խոստովանել, որ այդ հանդիպումները անակնկալ են ինչպես քաղբանտարկյալների, այդպես էլ հասարակական-քաղաքական շրջանակների համար:
Անակնկալն առավել ևս արտահայտվում է այն հանգամանքի ֆոնին, որ ապրիլի 28-ին Լևոն Տեր-Պետրոսյանը Կոնգրեսի հանրահավաքի ժամանակ իր համոզմունքն էր հայտնել, որ մայիսի ընթացքում բոլոր քաղբանտարկյալները ազատ են արձակվելու, և Սասուն Միքայելյանն ու Նիկոլ Փաշինյանը մայիսի 31-ի հանրահավաքում ողջունելու են քաղաքացիներին: Դժվար է ասել, արդյոք Կոնգրեսի առաջնորդի այցը զուտ զորակցությա՞ն այց է` բարոյահոգեբանական իմաստով, թե՞ ներկայիս քաղաքական գործընթացի մաս է, և Կոնգրեսի առաջնորդը հարկ է համարել առկա իրավիճակի մասին խոսել նաև Սասուն Միքայելյանի և Նիկոլ Փաշինյանի հետ: Վերջիվերջո դժվար է հերքել, որ խոսելու առիթ կամ թեմա կա` նկատի ունենալով այն, որ անգամ լինելով բանտում` Սասուն Միքայելյանն ու Նիկոլ Փաշինյանը, ըստ էության, առանցքային դեմքեր են հանդիսացել ներքաղաքական թեմատիկայի շրջանակում:
Այստեղ ամենևին խնդիր չկա նվազեցնել մյուս քաղբանտարկյալների կարևորությունը համաժողովրդական շարժման համար, բայց հասկանալի է, որ Սասուն Միքայելյանն ու Նիկոլ Փաշինյանն, այսպես ասած, միշտ եղել են հրապարակում պրակտիկ քաղաքական կշռով, հետևաբար ներքաղաքական գործընթացների ներկայիս կարևոր փուլում, թերևս, հանգուցային նշանակություն կարող են ունենալ Լևոն Տեր-Պետրոսյանի այցերը Սասուն Միքայելյանին և Նիկոլ Փաշինյանին: Դրանց բովանդակությանը հանրությունը, թերևս, կծանոթանա կամ ավելի ճիշտ` հնարավորություն կունենա դրանց բովանդակությունը շոշափել մայիսի 31-ի հանրահավաքի ընթացքում, եթե ոչ ուղղակի հայտարարությունների, ապա գոնե ընդդիմության ռիտորիկայի հնչերանգների միջոցով: Իսկ մինչ այդ, իհարկե գլխավոր սպասումը մնում է քաղբանտարկյալների ազատ արձակումը:
Այցելելով նրանց` Լևոն Տեր-Պետրոսյանը, ըստ էության, հրապարակավ պատասխանատվություն է ստանձնում նրանց ազատության համար, ինչի մասին հայտարարել էր ապրիլի 28-ի հանրահավաքում: Եվ անգամ չի էլ բացառվում, որ այցն ինքնին նաև այդ պատասխանատվության իրացման շղթայի մի օղակ է:
Լուսանկարը՝ Գագիկ Շամշյանի