Վրացական IPN կայքի փոխանցմամբ, ԵՄ-ն առավել ակնդետ է հետևելու վրացական բանտերում տիրող վիճակին: Այս մասին նշված է ԵՄ-ի արտաքին կապերի ծառայության նամակում.
«Մենք ստացել ենք վրաց իրավապաշտպանների գրավոր մտահոգությունը վրացական բանտերում տիրող վիճակի վերաբերյալ: Նրանք նշում են, որ վրացական իշխանությունները բավական քայլեր չեն ձեռնարկում մարդու իրավունքների պաշտպանության ուղղությամբ:
Մենք հաշվի կառնենք այդ քննադատությունները և այսուհետ առավել ակնդետ կհետևենք վրացական բանտերում տիրող վիճակին: Ժողովրդավարության ու մարդու իրավունքների թեման առաջնահերթ է ԵՄ-ի ու Վրաստանի միջև»:
Հիշեցնենք, որ նախորդ տարի, 2009 թվականի համեմատ, վրացական բանտերում բանտարկյալների մահացության դեպքերն աճել են 50 տոկոսով: 2010 թվականին վրացական բանտերում մահացածների 32 տոկոսի (այսինքն` յուրաքանչյուր 3-րդ մահացած բանտարկյալի) մոտ հայտնաբերվել են այս կամ այն աստիճանի մարմնական վնասվածքներ: Վրաստանի ժողովրդական պաշտպան Գեորգի Տուգուշիի` օմբուդսմենի տվյալներով, անցյալ տարի վրացական բանտերում մահացել է 142 մարդ, որոնցից 42-ը տառապել են թոքախտով:
Լոնդոնի թագավորական քոլեջի գիտնականների կողմից մշակված World Prison Population List-ի (բանտերի բնակչության համաշխարհային ցուցակ) համաձայն` Վրաստանը աշխարհի 217 երկրների ցանկում 6-րդ տեղն է զբաղեցնում, քանի որ երկրում 100.000 մարդուն 538 բանտարկյալ է բաժին ընկնում: Վրաստանում եղած 18 բանտերից 9-ում բանտարկյալների թիվը գերազանցում է թույլատրելի սահմանը: 8 հոգու համար նախատեսված բանտախցերում 12-13 կալանավոր են պահում: Թբիլիսիի թիվ 1 բանտում, որը նախատեսված է 750 բանտարկյալների համար, այժմ պահվում է շուրջ 1200 կալանավոր, իսկ Բաթումի բանտում բանտարկյալների թիվը 715 է` նախատեսված 557-ի փոխարեն:
