«Միասին» երիտասարդական շարժման ղեկավար Հակոբ Հակոբյանը, «ԵՊՀ երիտասարդ համալսարանականների միավորում» կազմակերպության նախագահ Գևորգ Մելքոնյանը, ՀՅԴ Նիկոլ Աղբալյան ուսանողական միության ատենապետ Միքայել Խոսրովյանը և ԳԱԱ երիտասարդ գիտնականների խորհրդի նախագահ Գևորգ Վարդանյանը մամուլի ասուլիսի ժամանակ հայտարարեցին, որ Հայաստանի և Սփյուռքի երիտասարդությանը միավորողը Ցեղասպանության և Արցախի խնդիրն է: Գևորգ Մելքոնյանը կարևորում է երիտասարդների մեջ քաղաքացիական գիտակցություն և պետական մտածողություն սերմանելը: «Առաջին լրատվականը» Գևորգ Մելքոնյանից հետաքրքրվեց, թե ինչպես է վերաբերվում այն փաստին, որ Հայ ազգային կոնգրեսի երիտասարդների նկատմամբ պարբերաբար կիրառվում են բռնություններ, նրանց ձերբակալում են: Գևորգ Մելքոնյանը պատասխանեց, որ երբ երիտասարդները կարգը խախտում են, այդպես է պետք վարվել: Սակայն նա դժվարացավ պատասխանել այն հարցին, թե արդյոք ՀԱԿ երիտասարդները խախտել են կարգը, թե ոչ, նշելով միայն, որ ինքն այդ ակցիային չի մասնակցել: