ՀՀ պաշտպանության նախարար Սեյրան Օհանյանը երեկ հանդիպել է Իրանի Իսլամական Հանրապետության պաշտպանության և զինված ուժերի աջակցման նախարարի տեղակալ Ռեզա Մոզաֆարի Նիայի հետ: Հանդիպման ժամանակ քննարկվել են պաշտպանության ոլորտում հայ-իրանական համագործակցությանն առնչվող հարցեր:
Ռազմական փորձագետ Արծրուն Հովհաննիսյանը հայ-իրանական նման համագործակցությունը դրական է գնահատում: «Եթե հաշվի առնենք, որ այսօր Հայաստանը Ադրբեջանի, Թուրքիայի հետ խնդիրներ ունի, իսկ Վրաստանը խնդիրներ է հարուցում ռուսական ռազմական բեռների փոխադրման կապակցությամբ, սխալ կլինի չօգտագործել այն ռազմական ներուժը, որն ունի Իրանը»,- «Առաջին լրատվականի» հետ զրույցում նկատեց Հովհաննիսյանը:
Փորձագետի գնահատմամբ, պարտադիր չէ, որ ռազմական համագործակցությունն ուղղված լինի որևէ մեկի դեմ, և անգամ եթե տարածաշրջանը լարված է, դա դեռ չի նշանակում, որ նման հանդիպումներով ինչ-որ մեկի դեմ դաշինք է կազմվում:
«Որքան էլ որ Իրանը մեկուսացված է արևմտյան տերությունների կողմից, այնուամենայնիվ, այն տարածաշրջանային գերտերություն է, և նախանձելի են նրանց ռազմարդյունաբերության բնագավառի վերջին տարիների զարգացումները: Իրանն այն երկիրն է, որը մեր նկատմամբ բարիդրացիականորեն է տրամադրված, իսկ տնտեսական ոլորտում մեր շփումները բավականին սերտ են. ինչո՞ւ պիտի ռազմական համագործակցություն չունենանք: Եվ եթե մինչ այժմ չունենք, ապա դա մեծ բաց է»,- մանրամասնեց Հովհաննիսյանը:
