Միջազգային Amnesty International իրավապաշտպան կազմակերպությունը մայիսի 23-ին հրապարակել է աշխարհի 159 երկրներում մարդու իրավունքների վիճակի մասին ամենամյա զեկույցը:
Ռուսաստանին նվիրված բաժնում զեկույցի հեղինակները մատնանշել են քաղաքացիական ակտիվությունը ճնշող նոր հետադիմական օրենքների ընդունումը: Այսպես. ոչ առևտրային այն կազմակերպություններին, որոնք արտասահմանից ֆինանսավորվում են և մասնակցում քաղաքական գործընթացներին, համարում են «արտասահմանցի գործակալներ»:
Ընդ որում, ինչպես նշվում է զեկույցում, իշխանությունները պարբերաբար փորձում են սևացնել որոշ ոչ առևտրային կազմակերպությունների հեղինակությունը ու իրավապաշտպաններին:
Այդ ամենը, ինչպես գրում են զեկույցի հեղինակները, կարող է հետագայում հանգեցնել այդ ոչ առևտրային կազմակերպությունների ղեկավարների կալանքներին ու մեծ տուգանքների:
Զեկույցում խոսվում է նաև իշխանությունների կողմից խաղաղ հավաքները սահմանափակելու դեպքերի մասին. բողոքի խաղաղ ցույցերը ոստիկանությունը ցրում է հաճախ ուժի կիրառմամբ:
Ընդ որում, ինչպես գրվում է Amnesty International-ի զեկույցում, կառավարամետ կազմակերպությունների ու ուղղափառ ակտիվիստների հավաքները թույլատրվում է անցկացնել առանց իշխանությունների համաձայնության:
Զեկույցի հեղինակները նշում են նաև, որ 2012թ. հունիսին ընդունված փոփոխություններով խստացվում է հրապարակային հավաքների մասին օրենքը:
Amnesty International-ը ուշադրություն է հրավիրում խոսքի ազատության սահմանափակման վրա՝ ընդգծելով զրպարտության հոդվածի վերադարձը Քրեական օրենսգիրք ու պետական դավաճանություն ու լրտեսություն հասկացությունների ընդլայնումը: Անդրադարձ է կատարվել նաև արգելված կայքերի ռեեստրի ստեղծմանը:
Զեկույցում անդրադարձել են նաև դատարանների ոչ օբյեկտիվությանը ու քաղաքական ենթատեքստերով գործընթացների մեծացող թվին:
Զեկույցի առանձին հեղինակներ ուշադրություն են հրավիրում նաև Pussy Riot-ի մասնակիցների դատավճռի վրա:
Բացի այդ՝ Amnesty International-ը մատնանշում է սեռական փոքրամասնությունների հանդեպ ճնշումները, ռասայական ու կրոնական խտրականությունը և Հյուսիսային Կովկասում անկայուն իրավիճակը:
