Amnesty International միջազգային իրավապաշտպան կազմակերպությունը հրապարակել է աշխարհում մարդու իրավունքների վիճակի մասին ամենամյա հերթական զեկույցը: Զեկույցը տեղադրված է կազմակերպության կայքում:
Հետադարձ հայացք նետելով վերջին քաղաքական զարգացումներին՝ կազմակերպությունը զեկույցում հիշեցնում է, որ նախագահ Սերժ Սարգսյանի Հանրապետական կուսակցությունը հաղթեց մայիսի 6-ին կայացած խորհրդարանական ընտրություններում, և թեև խոսքի, հավաքների ազատությունները լայն առումով սահմանափակված չեն եղել, դիտորդները հայտնում են համատարած ձայներ գնելու և ընտրողների վրա ճնշում գործադրելու դեպքերի մասին:
Կամարտահայտման ազատությունը զգալիորեն անսահմանափակ է, սակայն կարծիք արտահայտողները ընկալվել են որպես ոչ հայրենասեր կամ հակաազգայնական և արժանացել հանրության թշնամությանն ու երբեմն նաև բռնությանը, ասվում է զեկույցում: Ոստիկանությունն ու տեղի իշխանությունները երբեմն հայտնվել են հարձակումների դավադրության մեջ: Նրանք նաև ձախողել են այդ գործողությունները հավուր պատշաճի հետաքննելու ու հրապարակավ և անկողմնակալ դատապարտելու հարցերը:
Զեկույցում անդրադարձ է կատարվում քաղաքացիական հասարակության կողմից Հայաստանում ադրբեջանական ֆիլմերի փառատոնի անցկացման առիթով տեղի ունեցած բողոքներին ու հարձակումներին, որոնց հետևանքով փառատոնի անցկացման երկու փորձերը ձախողվեցին (ապրիլի 12-ին՝ Գյումրիում և ապրիլի 16-ին՝ Վանաձորում):
Զեկույցում չի անտեսվել նաև Երևանում մայիսի 8-ին գեյերի ակումբի վրա տեղի ունեցած հարձակումը: Տեսահսկման խցիկները ի հայտ էին բերել հարձակումն իրականացրած երկու անձանց, որոնք պատուհաններից «Մոլոտովի կոկտեյլներ» էին նետել: Երկու երիտասարդները ձերբակալվել էին, սակայն կարճ ժամանակ անց ազատ արձակվել Դաշնակցություն կուսակցության երկու խորհրդարանականների միջնորդության արդյունքում: Նրանք արդարացրին հարձակումը՝ ասելով, որ այն համապատասխանում է սոցիալական և ազգային գաղափարախոսության համատեքստին: Զեկույցում անդրադարձել են նաև տեղական մամուլում կատաղի հարձակումն արդարացրած Էդուարդ Շարմազանովի հայտարարությանը:
Հոկտեմբերի 3-ին Խոշտանգումների կանխման եվրոպական կոմիտեն հրապարակել է զեկույց 2011-ի դեկտեմբերին Հայաստան կատարած այցի արդյունքներով: Նրանում ասվում է, որ նախորդ այցերին արված խորհուրդներից գրեթե ոչ մեկը չի իրականացվել: Զեկույցում նշվում է, որ Երևանի «Կենտրոն» ՔԿՀ-ում աղքատիկ պայմանները կալանքի տևական ժամկետները անհնար են դարձրել: Հանձնաժողովը հայտնաբերել է, որ ցմահ ազատազրկման դատապարտվածների պահման պայմանները անմարդկային են:
Նշվում է, որ մինչ տարեվերջ ավելի քան 30 տղամարդիկ ազատազրկման ժամկետներ են կրել գիտակցաբար զինծառայությունից խուսափելու համար: Այլընտրանքային քաղաքացիական ծառայությունը մնում է զինվորական վերահսկողության ներքո: Նոյեմբերի 27-ին Մարդու իրավունքների եվրոպական դատարանը հայտարարել է, որ Հայաստանը խախտել է Եհովայի 17 վկաների ազատության և անվտանգության իրավունքները, ինչպես նաև ապօրինի կալանքի փոխհատուցման իրավունքը: Նրանց դեմ մեղադրանքներ էին առաջադրվել, քանի որ նրանք լքել էին այլընտրանքային ծառայությունը, երբ գիտակցել էին, որ գտնվում են զինվորական վերահսկողության ներքո:
