Թուրքական Cihan լրատվական գործակալության փոխանցմամբ, Հուշարձանների պահպանության համաշխարհային հիմնադրամը (WMF, World Monuments Fund) Անիի ավերակների պահպանման շուրջ համաձայնագիր է կնքել Թուրքիայի մշակույթի ու զբոսաշրջության նախարարության հետ:
Անհետացման շեմին հայտնված պատմական արժեքների պահպանմամբ զբաղվող WMF-ի տարածած հայտարարության մեջ նշված է, որ 10-րդ դարում հիմնադրված հրաշալի քաղաքի` Անիի ավերակների վերականգնման նախագծին աջակցում են ԱՄՆ Պետքարտուղարությունը և Թուրքիայի մշակույթի ու զբոսաշրջության նախարարությունը:
Վերջինս իր հերթին նշել է, որ Անիի ավերակների վերականգնումը նոր շունչ կհաղորդի տարածաշրջանի կյանքին և ֆինանսական նոր հնարավորություններ կընձեռի:
Առաջին փուլում նախատեսված է վերականգնողական աշխատանքներ իրականացնել Անիի Մայր տաճարում ու Սուրբ Փրկիչ եկեղեցում: Ընդհանուր առմամբ, պլանավորված է նախագծի աշխատանքներն ավարտել երեք տարվա ընթացքում: Ֆինանսական ծախսերը հոգալու են WMF-ն և Թուրքիայի մշակույթի ու զբոսաշրջության նախարարությունը:
Հիշեցնենք, որ առավել վաղ նշվում էր, որ Անիի ավերակների գոյությանն առաջին հերթին սպառնում են հորդառատ տեղումներն ու կայծակը:
