hy-am.org նախագծի ներկայացրած «Հայերեն լեզվի սատարումը բջջային օպերացիոն համակարգերում» ծրագիրը հնարավորություն է տալիս սմարթֆոներում և շարժական այլ սարքերում հայերեն կարդալ վեբ-կայքեր, էլեկտրոնային գրքեր և այլն:
Ծրագիրն իրականացվել է Բաց հասարակության հիմնադրամներ-Հայաստան գրասենյակի աջակցությամբ՝ նպատակ ունենալով խթանել տեղեկատվության հայերենով հասանելիությունը: Այն նաև հնարավորություն է տալիս հայերեն տառերը տեսնել Անդրոիդ, Մաեմո, ՄիԳո, Սիմբիան և Վինդոուզ Մոբայլ համակարգերով աշխատող սարքերում: Այս համակարգերում, բացառությամբ Սիմբիանի, հնարավոր կդառնա նաև տեքստը հայերեն հավաքել և հաղորդակցվել:
Տառատեսակները կարելի է հեշտությամբ տեղադրել հեռախոսների մեջ հատուկ ստեղծված ծրագրային փաթեթների օգնությամբ. դա կարող է անել ցանկացած օգտագործող: Արդյունքում օգտագործողը հնարավորություն կստանա հայերեն տեքստերը կարդալ կարճ հաղորդագրությունների, կայքերի, էլ-փոստի, փաստաթղթերի, էլեկտրոնային գրքերի, բառարանների, հանրագիտարանների, քարտեզների և սոցիալական ցանցերի հետ աշխատելիս:
«Դեռ մի 10-15 տարի առաջ մենք ունեինք նախ էլեկտրոնային ինֆորմացիայի հայերեն քոնթենթի խնդիր: Հետո ունեցանք հայերեն բազա և անհրաժեշտ դարձավ դրանից օգտվելու մեխանիզմների զարգացումը»,- ամփոփիչ միջոցառման ժամանակ ասաց ծրագիրն իրականացրած Բաց հասարակության հիմնադրամներ-Հայաստան գրասենյակի տնօրեն Լարիսա Մինասյանը:
Հայերեն տառատեսակների հեղինակ Ռուբեն Թառումյանը ներկայացրեց իր ստեղծած 21 տառատեսակները, որոնցով հնարավոր է կարդալ և գրել Android, Symbian, Maemo, MeeGo և Windows Mobile օպերացիոն համակարգերում:
Տառատեսակները հնարավոր է բեռնել http://b.hy-am.org կայքից` ինչպես համակարգչով, այնպես էլ անմիջապես հեռախոսով:
Ծրագրային փաթեթները ներբեռնման ու տեղակայման համար հասանելի են hy-am.org կայքում:
Նշենք, որ ստեղծված տառատեսակներն ու լուծումները տարածվում են անվճար` բաց լիցենզավորմամբ:
