Միջուկային անվտանգության հարցերով 4-րդ գագաթնաժողովը, որը կկայանա մարտի 31-ին Վաշինգտոնում, ԱՄՆ նախագահին հազվագյուտ հնարավորություն կտա՝ Լեռնային Ղարաբաղի հակամարտության կարգավորման համար։ Այս մասին գրում է Ռոբ Սուբհանին (Caspian Group Holdings-ի գործադիր տնօրեն) Washington Times-ի իր հոդվածում։
«Մինչ համաշխարհային առաջնորդների համար կարևոր է պայմանավորվելն այն մասին, թե ինչպես լավագույնս հեռու պահել միջուկային զենքը վտանգավոր պետությունների կամ ահաբեկչական խմբերի ձեռքից, Ադրբեջանի և Հայաստանի նախագահներ Իլհամ Ալիևի և Սերժ Սարգսյանի ներկայությունը ԱՄՆ նախագահ Բարաք Օբամայի համար հազվագյուտ պատմական պահ է՝ առաջատար դեր ստանձնելու Խորհրդային կայսրության փլուզումից հետո մնացած ամենախնդրահարույց հակամարտություներից մեկի լուծման գործում»,- գրում է Սոբհանին։
Նախագահ Օբաման միանգամայն կարող է բեկում մտցնել, որը կարող է ստեղծել նոր սկիզբ Հայաստանի և Ադրբեջանի ժողովուրդների համար՝ հուսալի դիվանագիտական նախաձեռնությունը տանելով երկու կողմերի համար մշտական արդար լուծում գտնելուն։
Հոդվածագիրը նշում է, որ երկու երկրներն էլ կշահեն խաղաղության շահաբաժնից։ Հակամատության՝ ԱՄՆ-ի առաջնորդությամբ դիվանագիտական լուծումը կսանձազերծի աճը հետկոնֆլիկտային միջավայրում։ Հայաստանի և Ադրբեջանի միջև առևտուրն անմիջական ազդեցություն կունենա միլիոնավոր մարդկանց կյանքի վրա։
Կարգավորման շրջանակը կարող է ներառվել Հայ-ադրբեջանական հաշտեցման ու վերակառուցման հիմնադրամ, որը ներդրում կանի ենթակառուցվածքային նախագծերում, և Ադրբեջանի ֆինանսներով՝ Հայաստանի միջոցով դեպի Եվրոպա գազ արտահանող խողովակաշարի ընդլայնումը։
Հոդվածագիրը հույս է հայտնում նաև երկու երկրների առաջին տիկինների գլխավորությամբ Միջմշակութային հիմնադրամի ստեղծման մասին, որը կրոնական հանդուրժողականության վերականգնման նպատակ կունենա։
«Օբաման պետք է համոզի Հայաստանի ու Ադրբեջանի նախագահներին, որ ԱՄՆ-ը նրանց մեջքով չի շրջվի, և աշխատունակ լուծումը կարող է բավարարել երկու ժողովուրդներին՝ թույլ տալով նրանց քաղաքացիներին ապրել խաղաղությամբ և տալ նրանց հնարավորություն՝ վերջապես զարգացնելու վստահություն, լինելու լավ ու փոխգործակցող հարևաններ աշխարհի այդ անհանգիստ տարածաշրջանում»,- նշում է հոդվածագիրը։
«ԱՄՆ նախագահը կարող է խաղաղություն նվիրել Հայաստանին ու Ադրբեջանին»,- գրում է հեղինակն ու մեջբերում Հոլոքոստը վերապրած Էլի Վիզելի խոսքերը. «Խաղաղությունն Աստծո նվերը չէ իր արարածներին, խաղաղությունը մեր նվերն է միմյանց»։